Showing posts with label Eastren. Show all posts
, , ,

September 23, 2026

 


நூருல் ஹுதா உமர்


“வளமான நாடு – அழகான வாழ்வு” எனும் தொனிப்பொருளின் கீழ் நாடளாவிய ரீதியில் முன்னெடுக்கப்பட்ட உள்ளூராட்சி வாரத்தை முன்னிட்டு, சம்மாந்துறை பிரதேச சபையினால் ஏற்பாடு செய்யப்பட்ட இறுதி நாள் நிகழ்வு சம்மாந்துறை பிரதேச சபை கேட்போர் கூடத்தில் இடம்பெற்றது.

சம்மாந்துறை பிரதேச சபை தவிசாளர் ஐ.எல்.எம். மாஹிர் தலைமையில் நடைபெற்ற இந்நிகழ்வில், சம்மாந்துறை பிரதேச செயலாளர் எஸ்.எல். முஹம்மது ஹனீபா, பிரதேச சபை உப தவிசாளர் வீ. வினோகாந்த், பிரதேச சபை செயலாளர் யூ.எல். அப்துல் மஜீட், பிரதேச சபை உறுப்பினர்களான வை.வீ.எம். நபாஸ், ஏ.எல்.எம். ஜிப்ரி, எஸ். நளீம், எஸ்.எம்.எஸ். நிலூவ்பா, எம்.ஐ.எம். றிஸ்விக் கான், எஸ்.எல்.ஏ. நஸார், எம்.எல்.ஏ. கபூர் உள்ளிட்ட உறுப்பினர்கள், உத்தியோகத்தர்கள் மற்றும் பலர் கலந்து கொண்டனர்.

கடந்த ஒரு வார காலமாக சம்மாந்துறை பிரதேச சபையினால் முன்னெடுக்கப்பட்ட உள்ளூராட்சி வார நிகழ்வுகளின் நிறைவாக இந்நிகழ்வு ஏற்பாடு செய்யப்பட்டது.உள்ளூராட்சி நிறுவனங்களின் சேவைகள், பொதுமக்கள் பங்கேற்பு, சமூகப் பொறுப்பு மற்றும் பிரதேச அபிவிருத்தி தொடர்பான விழிப்புணர்வை ஏற்படுத்தும் வகையில் பல்வேறு நிகழ்வுகள் மற்றும் போட்டி நிகழ்ச்சிகள் உள்ளூராட்சி வார காலப்பகுதியில் முன்னெடுக்கப்பட்டிருந்தன.

அந்நிகழ்வுகளில் ஆர்வத்துடன் பங்கேற்றவர்களுக்கும், பல்வேறு போட்டி நிகழ்ச்சிகளில் வெற்றிபெற்றவர்களுக்கும் இதன்போது சான்றிதழ்கள் வழங்கப்பட்டு கௌரவிக்கப்பட்டனர். பொதுமக்களுக்கும் உள்ளூராட்சி நிறுவனங்களுக்கும் இடையிலான தொடர்பை மேலும் வலுப்படுத்துவதுடன், மக்கள் பங்கேற்புடன் கூடிய சிறந்த உள்ளூராட்சி நிர்வாகத்தை உருவாக்குவதன் முக்கியத்துவத்தையும் இந்நிகழ்வுகள் எடுத்துக்காட்டியதாக ஏற்பாட்டாளர்கள் தெரிவித்தனர்.
, , ,

September 17, 2026

 


நூருல் ஹுதா உமர்


மாஸ்டர் பேக்கேஜிங் இன்டர்நேஷனல் (பிரைவேட்) லிமிடெட் நிறுவனத்தின் மாஸ்டர் பிரின்டர்ஸ் புதிய கெட்டலொக் (Catalogue) வெளியீட்டு விழா இன்று (17) கல்முனையில் நடைபெற்றது.

கல்முனை மயோன் பிலாஸா வரவேற்பு மண்டபத்தில் நடைபெற்ற இந்நிகழ்வில், இந்தியா- தமிழ்நாடு சிறுபான்மையினர் நலத்துறை அமைச்சர் மாண்புமிகு எம்.எம். ஷாஜஹான் பிரதம அதிதியாகக் கலந்து கொண்டார்.

மேலும், பாராளுமன்ற உறுப்பினரும் ஸ்ரீ லங்கா முஸ்லிம் காங்கிரஸ் தலைவருமான ரவூப் ஹக்கீம் கௌரவ அதிதியாகவும், பாராளுமன்ற உறுப்பினரும் ஸ்ரீ லங்கா முஸ்லிம் காங்கிரஸ் செயலாளர் நாயகமுமான ஜனாதிபதி சட்டத்தரணி நிஸாம் காரியப்பர், முன்னாள் பாராளுமன்ற உறுப்பினரும் பொத்துவில் பிரதேச சபை தவிசாளருமான சட்டத்தரணி எஸ்.எம்.எம். முஷாரப், கல்முனை மாநகர முன்னாள் முதல்வர் சிராஸ் மீராசாஹிப், முன்னாள் பிரதி முதல்வர் ரஹ்மத் மன்சூர் ஆகியோர் அதிதிகளாகக் கலந்து கொண்டனர்.

அச்சு மற்றும் பொதியிடல் துறையில் மாஸ்டர் பிரின்டர்ஸ் நிறுவனத்தினால் வழங்கப்படும் தயாரிப்புகள் மற்றும் சேவைகளை ஒரே தொகுப்பில் அறிமுகப்படுத்தும் வகையில் புதிய கெட்டலொக் வெளியிடப்பட்டது. இந்த புதிய கெட்டலொக் அறிமுக உரையை கல்வியலாளர் றிசாத் செரீப் நிகழ்த்தினார்.

நிறுவனத்தின் புதிய தயாரிப்புகள், அச்சுத் தீர்வுகள் மற்றும் பொதியிடல் துறையிலான சேவைகள் தொடர்பான தகவல்களை வாடிக்கையாளர்கள் மற்றும் வர்த்தகத் துறையினருக்கு இலகுவாக அறிந்துகொள்ளும் வகையில் இந்த கெட்டலொக் தயாரிக்கப்பட்டிருந்தது.

நிகழ்வில் ஊடகவியலாளர்கள், இந்திய முஸ்லிம் லீக் பிரதிநிதிகள், வர்த்தகர்கள், தொழில்துறை பிரதிநிதிகள், வாடிக்கையாளர்கள் மற்றும் அழைக்கப்பட்ட அதிதிகள் உள்ளிட்ட பலரும் கலந்து கொண்டனர்.

, ,

September 01, 2026


 நூருல் ஹுதா உமர்


நீதி மற்றும் தேசிய ஒருமைப்பாட்டு அமைச்சின் கீழ் இயங்கும் தேசிய ஒருமைப்பாடு மற்றும் நல்லிணக்கத்திற்கான அலுவலகத்தின் (ONUR) ஒத்துழைப்புடன், வேள்வி பெண்கள் அபிவிருத்தி ஒன்றியத்தினால் அம்பாறை மாவட்டத்தில் பல்லின மக்களிடையே சமூக சகவாழ்வு மற்றும் நல்லிணக்கத்தை மேம்படுத்தும் செயற்றிட்டம் முன்னெடுக்கப்பட்டு வருகின்றது.

இதன் அடிப்படையில், கல்முனை பிரதேச செயலகப் பிரிவுக்குட்பட்ட கமு/கமு/அல்-பஹ்ரியா மகா வித்தியாலயத்தில் தரம் 10 மற்றும் 11 மாணவர்களுக்கான சமூக நல்லிணக்கம் தொடர்பான விழிப்புணர்வு கருத்தரங்கு நடைபெற்றது.

பாடசாலையின் அதிபர் எம்.எஸ்.எம். பைசல் அவர்களின் தலைமையில் நடைபெற்ற இக்கருத்தரங்கில், இலங்கை மனித உரிமைகள் ஆணைக்குழுவின் கல்முனை பிராந்திய இணைப்பாளர் ஜனாப் ஏ.சி.ஏ. அசிஸ் அவர்கள் வளவாளராகக் கலந்து கொண்டு சமூக நல்லிணக்கம், மொழி உரிமைகள், சுற்றாடல் பாதுகாப்பு மற்றும் பாலின சமத்துவம் ஆகிய விடயங்கள் தொடர்பாக மாணவர்களுக்கு விரிவான விளக்கங்களை வழங்கினார். மேலும், சமூகத்தில் நல்லிணக்கம் மற்றும் சகவாழ்வை கட்டியெழுப்புவதில் மாணவர்களின் பங்களிப்பு, பொறுப்பு மற்றும் முக்கியத்துவம் குறித்தும் எடுத்துரைத்தார்.
, ,

August 31, 2026


 நூருல் ஹுதா உமர்


சாய்ந்தமருது பிரதேசத்தில் ஆட்டிறைச்சியை நாய் இறைச்சி எனக் குறிப்பிட்டு சமூக ஊடகங்களிலும், பொதுமக்கள் மத்தியிலும் பரவி வரும் தகவல்கள் உண்மைக்குப் புறம்பானவை என சாய்ந்தமருது சுகாதார வைத்திய அதிகாரி அலுவலகம் தெரிவித்துள்ளது.

சாய்ந்தமருது சுகாதார வைத்திய அதிகாரி மற்றும் பொதுச் சுகாதார பரிசோதகர்கள் இணைந்து, கடந்த 29.08.2026 அன்று சாய்ந்தமருது பிரதான வீதிப் பகுதியில் உள்ள உணவு கையாளும் நிறுவனங்களில் வழமையான சுகாதாரப் பரிசோதனைகளை மேற்கொண்டுள்ளனர்.

இதன்போது, ஆட்டிறைச்சிக் கடையொன்றில் விற்பனைக்காக வைக்கப்பட்டிருந்த ஆட்டிறைச்சி பரிசோதனைக்கு உட்படுத்தப்பட்டது. குறித்த இறைச்சி உரிய சுகாதார நடைமுறைகளைப் பின்பற்றாமல் விற்பனை செய்யப்பட்டிருந்ததுடன், அங்கீகரிக்கப்பட்ட முறையில் கால்நடை வைத்தியரின் பரிசோதனைச் சான்றிதழும் பெறப்படாதிருந்தமை அவதானிக்கப்பட்டதாக தெரிவிக்கப்பட்டுள்ளது.

இதனைத் தொடர்ந்து, பொதுச் சுகாதார பரிசோதகர்களால் குறித்த இறைச்சி கையகப்படுத்தப்பட்டு, இறைச்சிக் கடை உரிமையாளரின் அனுமதியுடன் அழிக்கப்பட்டதாக சுகாதார வைத்திய அதிகாரி அலுவலகம் தெரிவித்துள்ளது.

எனினும், இச்சம்பவத்தைத் திரிபுபடுத்தி, சாய்ந்தமருது பகுதியில் நாயிறைச்சி விற்பனை செய்யப்பட்டதாகவும், அதனை பொதுச் சுகாதார பரிசோதகர்கள் பறிமுதல் செய்ததாகவும் சமூக ஊடகங்களில் பரப்பப்படும் தகவல்களில் எவ்வித உண்மைத்தன்மையும் இல்லை என அந்த அலுவலகம் வலியுறுத்தியுள்ளது.

மேலும், உண்மைக்குப் புறம்பான இத்தகவல்கள் ஏதோவொரு உள்நோக்கத்துடன் பொதுமக்கள் மத்தியில் பரப்பப்படுவதாக அவதானிக்கப்பட்டுள்ளதாகவும் தெரிவிக்கப்பட்டுள்ளது.

எனவே, இந்த விடயம் தொடர்பில் பொதுமக்கள் எவ்வித அச்சமோ பதற்றமோ கொள்ளத் தேவையில்லை எனவும், உறுதிப்படுத்தப்படாத மற்றும் உண்மைக்குப் புறம்பான தகவல்களை நம்பவோ, பிறருக்கு பகிரவோ வேண்டாம் எனவும் சாய்ந்தமருது சுகாதார வைத்திய அதிகாரி அலுவலகம் பொதுமக்களிடம் கேட்டுக்கொண்டுள்ளது.

, , ,

August 19, 2026


( எம்.என்.எம்.அப்ராஸ்)

 தமிழ் பேசும் சிறுபான்மை கட்சிகளின் ஒன்றிணைவு ஆளும் அரசியலுக்கு ஓர் ஆபத்தா? என பேராதனை பல்கலைக்கழகத்தின் சிரேஷ்ட விரிவுரையாளர் கலாநிதி முபிஸால் அபூபக்கர் கேள்வி எழுப்பியுள்ளார்.

 சமகால அரசியல் நிலை தொடர்பில் தொடர்பில் அவர் வெளியிட்டுள்ள ஊடக அறிக்கையில் மேலும் தெரிவிக்கையில், 

 தமிழ் பேசும் மக்களைப் பிரதிநிதித்துவப்படுத்தும் ஆறு சிறுபான்மை தமிழ்–முஸ்லிம் கட்சிகள் ஒன்றிணைந்து கூட்டமைப்பொன்றை உருவாக்கியிருப்பது இலங்கை அரசியலில் கவனிக்கத்தக்க புதிய நகர்வாகும். இந்த ஒன்றிணைவு வெறுமனே ஒரு அரசியல் கூட்டணி அல்ல. நீண்டகாலமாக தனித்தனியாக முன்வைக்கப்பட்டு வந்த தமிழ்–முஸ்லிம் சிறுபான்மை மக்களின் பிரச்சினைகளை ஒரு பொதுவான அரசியல் தளத்தில் முன்வைப்பதற்கான முயற்சியாகவும் இதனைப் பார்க்கலாம். ஆனால், இத்தகைய ஒன்றிணைவு உருவாகியுள்ள சூழலில் தமிழ்–முஸ்லிம் சமூகங்களுக்கிடையில் உணர்வுபூர்வமான பல்வேறு பிரச்சினைகள் அரசியல் விவாதங்களின் மையத்திற்கு வருவது கவனிக்க வேண்டிய விடயமாகும். 

இதற்கு கல்முனை ஆதார வைத்தியசாலை தொடர்பாக அண்மையில் எழுந்த ஆடை விவகாரத்தையும் உதாரணமாகக் குறிப்பிடலாம். குறிப்பாக, முஸ்லிம் பெண்களின் சமய ஆடை தொடர்பான பிரச்சினைக்கு அரசு பாராளுமன்றத்தில் பெரும்பான்மையை கொண்டிருந்தும், நிரந்தரமான சட்ட அல்லது கொள்கை மாற்றத்தை மேற்கொள்ளாமல் தற்காலிகத் தீர்வாக இடமாற்றம் போன்ற நடவடிக்கையை மேற்கொண்டிருப்பது பல்வேறு கேள்விகளையும் சந்தேகங்களையும் எழுப்புகிறது.

 ஒரு பிரச்சினைக்கு நிரந்தரமான சட்டரீதியான அல்லது நிர்வாகரீதியான தீர்வு தேவைப்படும் நிலையில், தற்காலிக நடவடிக்கைகள் மூலம் அதனை முடிவுக்குக் கொண்டுவருவது உண்மையில் பிரச்சினையைத் தீர்க்கிறதா அல்லது எதிர்காலத்திற்காக ஒத்திவைக்கிறதா? என்பது மட்டுமல்ல சிறுபான்மை கட்சிகளின் ஒன்றிணைவை சவாலுக்கு உட்படுத்தும் பல பரிட்சையில் அரசு ஈடுபடுகின்றதா?என்ற கேள்வியும் எழுகிறது.அதேவேளை, சமய ஆடை, மதச்சுதந்திரம், மருத்துவத் துறையின் தொழில்முறை ஒழுங்கு, நிர்வாக நடைமுறைகள் மற்றும் பணியிட உரிமைகள் போன்ற விடயங்கள் அனைத்தும் தெளிவான சட்ட மற்றும் கொள்கை அடிப்படையில் அரசினுல் அணுகப்பட வேண்டும். அவை இன–மத முரண்பாடுகளாக மாற்றப்படுவது எந்த சமூகத்திற்கும் நன்மை தராது. 

இங்கு ஒரு முக்கியமான அரசியல் உண்மையை நாம் மறந்துவிடக் கூடாது சிறுபான்மை கட்சிகள் ஒன்றிணையும் போது, அவர்களுக்குள் பிளவை ஏற்படுத்தக்கூடிய எந்தவொரு உணர்வுபூர்வமான பிரச்சினையும் அந்த ஒன்றிணைவையே பலவீனப்படுத்தக்கூடும்.எனவே, ஒவ்வொரு பிரச்சினையையும் உடனடியாக இன அல்லது மத மோதலாகப் பார்க்காமல், அதன் சட்டப்பின்னணி, நிர்வாக நடைமுறை, மனித உரிமை பரிமாணம் மற்றும் அரசியல் விளைவுகளை ஆழமாக ஆராய வேண்டும். இதில் நடைமுறை அரசுக்கு பாரிய பொறுப்பு உள்ளது. தமிழ்–முஸ்லிம் அரசியல் ஒன்றிணைவு வெற்றி பெற வேண்டுமெனில், பரஸ்பர நம்பிக்கை, சமூகங்களுக்கிடையிலான சமத்துவம், ,பொதுவான அரசியல் குறைந்தபட்சத் திட்டம் ஜனநாயகப் பேரம்பேசல்,சட்டத்தின் ஆட்சி, மனித உரிமைகள் மற்றும் மதச்சுதந்திரத்திற்கான அர்ப்பணிப்பு உணர்வுபூர்வமான பிரச்சினைகளில் பொறுப்பான அரசியல் அணுகுமுறை ஆகியவை அவசியம். 

இந்த ஒன்றிணைவு யாருக்கும் எதிரானதாக இருக்கக் கூடாது. மாறாக, இலங்கையின் பன்மைத்துவ ஜனநாயகத்தை வலுப்படுத்தும் அரசியல் சக்தியாக அது வளர வேண்டும். ஆளும் பெரும்பான்மை அரசியலுக்கு உண்மையான சவால் சிறுபான்மை கட்சிகள் ஒன்றிணைவது மட்டுமல்ல.அந்த ஒன்றிணைவு மக்கள் நம்பிக்கையைப் பெற்று, கொள்கை அடிப்படையிலான வலுவான மாற்று அரசியல் சக்தியாக மாறுவதுதான் உண்மையான சவால். அதேபோன்று, ஆளும் அரசாங்கத்திற்கும் ஒரு முக்கியமான பொறுப்பு உள்ளது. பாராளுமன்றத்தில் பெரும்பான்மை இருப்பது சட்டங்களை நிறைவேற்றுவதற்கான அதிகாரத்தை மட்டுமல்ல; சிறுபான்மை மக்களின் உரிமைகள் தொடர்பான நீடித்த பிரச்சினைகளுக்கு தெளிவான, நியாயமான மற்றும் நிரந்தரமான தீர்வுகளை உருவாக்குவதற்கான பொறுப்பையும் வழங்குகிறது. தற்காலிகத் தீர்வுகள் தொடர்ந்து முன்வைக்கப்படும் நிலையில்,அவை அரசியல் நோக்கங்களைக் கொண்டவையா என்ற சந்தேகம் மக்களிடையே உருவாகுவது இயல்பானது. 

அந்தச் சந்தேகங்களை அகற்றுவது அரசாங்கத்தின் வெளிப்படைத்தன்மை மற்றும் கொள்கைத் தெளிவின் மூலமே சாத்தியமாகும். எனவே, சிறுபான்மை மக்களின் அரசியல் ஒன்றிணைவு ஒரு ஜனநாயக ஆபத்து அல்ல. மாறாக, அது ஆட்சியின் பொறுப்புணர்வையும் ஜனநாயகப் பேரம்பேசலையும் அதிகரிக்கும் ஒரு வாய்ப்பாக இருக்க முடியும். 

 அந்த வகையில் பெரும்பான்மை அரசு பிரச்சினைகளை உருவாக்கி பிரிப்பதைவிட, பிரச்சினைகளை நியாயமாகத் தீர்த்து ஒன்றிணைப்பதே இலங்கையின் எதிர்கால அரசியலுக்குத் தேவையாகும், என பேராதனை பல்கலைக்கழகத்தின் மெய்யியல் துறை சிரேஷ்ட விரிவுரையாளர் கலாநிதி முபிஸால் அபூபக்கர் தெரிவித்தார்.

, , ,

August 18, 2026


பாறுக் ஷிஹான்
அரச அதிகாரியைக் காதலிப்பதாகக் கூறித் துஷ்பிரயோகம்: முன்னாள் முதல்வர் சக்கி அதாவுல்லாஹ்வுக்குச் சிக்கல்



அரச பெண் அதிகாரி ஒருவரைத் திருமணம் முடிப்பதாக ஆசை வார்த்தைகள் கூறித் துஷ்பிரயோகம் செய்த குற்றச்சாட்டின் பேரில் கைது செய்யப்பட்ட அக்கரைப்பற்று மாநகர சபையின் முன்னாள் முதல்வர் சக்கி அதாவுல்லாஹ்வை விளக்கமறியலில் வைக்குமாறு அக்கரைப்பற்று நீதவான் நீதிமன்றம் உத்தரவிட்டுள்ளது.

இவ் வழக்கு அக்கரைப்பற்று நீதவான் முன்னிலையில் செவ்வாய்க்கிழமை (18) விசாரணைக்கு எடுத்துக்கொள்ளப்பட்ட போதே சந்தேகநபரை விளக்கமறியலில் வைக்குமாறு உத்தரவு பிறப்பிக்கப்பட்டது.குறித்த சந்தேக  நபரின் சார்பில், ஜனாதிபதி சட்டத்தரணி சரத் ஜெயமான, ஆஜரானார்.

சம்பவ பின்னணி:

கடந்த காலத்தில் அக்கரைப்பற்று மாநகர சபையின் முதல்வராக சக்கி அதாவுல்லாஹ் செயற்பட்டு வந்த போது, அங்கு கடமையாற்றிய அக்கரைப்பற்று பள்ளிக்குடியிருப்பைச் சேர்ந்த அரச உத்தியோகத்தரான பெண் ஒருவரைத் திருமணம் முடிப்பதாக வாக்குறுதி அளித்துத் தன்னைத் துஷ்பிரயோகத்திற்கு உட்படுத்தியதாகக் குறித்த பெண் அண்மையில் முகநூல்  நேரலை ஊடாக நியாயம் கேட்டிருந்தார்.அத்துடன்  இச் சம்பவம் தொடர்பில் அம்பாறை சிறுவர் மற்றும் மகளிர் பணியகத்திலும் அப்பெண் முறைப்பாடு செய்திருந்தார்.

முறைப்பாட்டைத் தொடர்ந்து, அம்பாறை சிறுவர் மற்றும் மகளிர் பொலிஸ் பிரிவினால் தேடப்பட்டு வந்த சந்தேகநபரான சக்கி அதாவுல்லாஹ், வாக்குமூலம் வழங்குவதற்காக அம்பாறை சிறுவர் மற்றும் மகளிர் பணியகத்திற்கு வருகை தந்திருந்தார்.இதன்போது, அப்பிரிவின் பொறுப்பதிகாரி பிரதம பொலிஸ் பரிசோதகர் தயானி கமகே தலைமையிலான குழுவினரால் அவர் உடனடியாகக் கைது செய்யப்பட்டார்.

அதிகாரத் துஷ்பிரயோகம் மற்றும் பாலியல் துஷ்பிரயோகம் தொடர்பில் கைது செய்யப்பட்ட சந்தேகநபருக்கு எதிராக அம்பாறை மாவட்ட பெண்கள் மற்றும் சிறுவர் பிரிவினரால் அக்கரைப்பற்று நீதவான் நீதிமன்றில் வழக்குத் தாக்கல் செய்யப்பட்டது.சட்ட நடவடிக்கைகளுக்காக நீதவான் முன்னிலையில் ஆஜர்படுத்தப்பட்ட வேளையில், அவரை ஆகஸ்ட் 19 ஆம் திகதி வரை விளக்கமறியலில் வைக்குமாறு நீதவான் உத்தரவிட்டார்.

இச் சம்பவம் தொடர்பான மேலதிக விசாரணைகளை அம்பாறை மாவட்ட பெண்கள் மற்றும் சிறுவர் பிரிவினர் தீவிரமாக முன்னெடுத்து வருகின்றனர்.
 

, , ,

August 16, 2026


 நூருல் ஹுதா உமர்


அம்பாறை மாவட்ட கரையோரப் பிரதேச மீனவர்கள் ஓய்வெடுத்தல், வலைகளைத் திருத்துதல் மற்றும் நலன்புரி நடவடிக்கைகளை மேற்கொள்வதற்கு பொருத்தமான இடமின்றி நீண்டகாலமாக பல்வேறு அசௌகரியங்களை எதிர்கொண்டு வந்த நிலையில், அவர்களுக்கான பல்தேவை கட்டிடமொன்றை காரைதீவு பிரதேசத்தில் அமைப்பதற்கான நடவடிக்கைகள் முன்னெடுக்கப்பட்டுள்ளதாக காரைதீவு பிரதேச சபை தவிசாளர் சுப்ரமணியம் பாஸ்கரன் தெரிவித்துள்ளார்.

இது தொடர்பில் இன்று ஊடகங்களுக்கு கருத்து வெளியிட்ட அவர், அம்பாறை மாவட்டத்தின் கரையோரப் பிரதேசங்களைச் சேர்ந்த மீனவர்கள் மற்றும் மீனவ அமைப்புகள் தமது பிரச்சினைகளைத் தீர்த்து வைப்பதற்காக காரைதீவு பிரதேச சபையிடம் தொடர்ச்சியாக கோரிக்கைகளை முன்வைத்து வந்ததாக குறிப்பிட்டார்.

மீனவர்களின் கோரிக்கையின் முக்கியத்துவத்தை கருத்திற்கொண்டு, சம்பந்தப்பட்ட அரச அதிகாரிகளின் கவனத்திற்கு இவ்விடயத்தை கொண்டு சென்று, பல்தேவை கட்டிடம் ஒன்றை அமைப்பதற்கான நடவடிக்கைகளை முன்னெடுத்ததாகவும் தவிசாளர் இதன்போது தெரிவித்தார்.

இதன் பயனாக, காரைதீவு பிரதேசத்தில் மீனவர்களுக்கான பல்தேவை கட்டிடமொன்றை அமைப்பதற்கு கிழக்கு மாகாண கட்டிடங்கள் திணைக்களம் அனுமதி வழங்கியுள்ளதாகவும், அதனைத் தொடர்ந்து அடுத்தகட்ட நடவடிக்கைகள் முன்னெடுக்கப்பட்டு வருவதாகவும் அவர் தெரிவித்தார்.

“மீனவர்கள் நீண்டகாலமாக எதிர்கொண்டுவந்த இந்தப் பிரச்சினைக்கு தீர்வு காண்பது எமது பொறுப்பாகும். அவர்களின் ஓய்வு, வலை திருத்தம் உள்ளிட்ட அத்தியாவசிய தேவைகளுக்கும், நலன்புரி நடவடிக்கைகளுக்கும் ஒரு நிரந்தர இடம் அவசியமாக இருந்தது. இதற்காக மீனவ அமைப்புகள் முன்வைத்த கோரிக்கைகளை உரிய அதிகாரிகளின் கவனத்திற்கு கொண்டு சென்று நடவடிக்கை எடுத்துள்ளோம்” என சுப்ரமணியம் பாஸ்கரன் தெரிவித்தார்.

மேலும், இத்திட்டத்திற்கு அனுமதி வழங்கி அடுத்தகட்ட நடவடிக்கைகளை முன்னெடுத்து வரும் கிழக்கு மாகாண கட்டிடங்கள் திணைக்களம் உள்ளிட்ட சம்பந்தப்பட்ட அரச அதிகாரிகளுக்கும் அவர் தனது நன்றியைத் தெரிவித்தார். மீனவர்களின் வாழ்வாதாரத்தை மேம்படுத்துவதற்கும், அவர்களின் அடிப்படை தேவைகளை நிறைவேற்றுவதற்கும் எதிர்காலத்திலும் பிரதேச சபை உரிய நடவடிக்கைகளை முன்னெடுக்கும் எனவும் காரைதீவு பிரதேச சபை தவிசாளர் சுப்ரமணியம் பாஸ்கரன் மேலும் தெரிவித்தார்.
, , ,

August 14, 2026

 


பாறுக் ஷிஹான்


 
அம்பாறை – வீரமுனைக் கிராமத்தில் கடந்த 1990 ஆம் ஆண்டு கொடூரமான முறையில் படுகொலை செய்யப்பட்ட 232 அப்பாவித் தமிழ் மக்களின் 36 ஆம் ஆண்டு நினைவேந்தல் நிகழ்வு  வீரமுனை நினைவுத் தூபியில் உணர்வுப்பூர்வமாக அனுஷ்டிக்கப்பட்டது.

நினைவேந்தல் நிகழ்வின்போது  அம்பாறை வீரமுனை ஸ்ரீ சிந்தா யாத்திரைப் பிள்ளையார் ஆலயத்திற்கு முன்பாக அமைக்கப்பட்டுள்ள நினைவுத் தூபிக்கு மலர் மாலை அணிவிக்கப்பட்டதுடன், படுகொலை செய்யப்பட்ட உறவுகளை நினைவுகூர்ந்து சுடரேற்றி ஒரு நிமிட மௌன அஞ்சலியும் செலுத்தப்பட்டது.

கடந்த அசாதாரண யுத்த சூழ்நிலை காரணமாக, சம்மாந்துறை பிரதேசத்தில் நிகழ்ந்த வன்செயல்களினால் அஞ்சிய வீரமுனை மற்றும் அதன் சுற்றுவட்டக் கிராமங்களான வீரச்சோலை, மல்லிகைத்தீவு, மல்வத்தை, வளத்தாப்பிட்டி, சொறிக்கல்முனை, அம்பாறை பகுதிகளைச் சேர்ந்த பல நூற்றுக்கணக்கான பொதுமக்கள், பாதுகாப்புத் தேடி வீரமுனை சிந்தா யாத்திரைப் பிள்ளையார் கோயில் வளவினுள்ளும் வீரமுனை இராமகிருஷ்ண மிஷன் பாடசாலை வளாகத்திலும் தஞ்சம் புகுந்திருந்தனர்.

அவ்வாறு தஞ்சம் புகுந்திருந்த வேளையில், கடந்த 1990 ஆம் ஆண்டு ஆகஸ்ட் மாதம் 12 ஆம் திகதி புகுந்த ஆயுததாரிகளால் 232 பொதுமக்கள் சுட்டும் வெட்டியும் கொடூரமாகப் படுகொலை செய்யப்பட்டனர்.

இச்சம்பவம் இடம்பெற்று 36 ஆண்டுகள் நிறைவடைந்துள்ள நிலையில், உயிரிழந்த உறவுகளின் ஆத்ம சாந்திக்காக அக்கிராம மக்களும் உறவினர்களும் ஒன்றிணைந்து இவ்வாறான நினைவேந்தல் வழிபாடுகளை முன்னெடுத்தமை குறிப்பிடத்தக்கது.

, , ,

August 13, 2026

 


நூருல் ஹுதா உமர்


மாளிகைக்காடு மக்களுக்கான நிரந்தரமான மாற்று மையவாடியை பெற்றுக்கொடுப்பதற்கான நடவடிக்கைகளை காரைதீவு பிரதேச சபை உடனடியாக ஆரம்பிக்க வேண்டும் என காரைதீவு பிரதேச சபையின் உப தவிசாளர் எம்.எச்.எம். இஸ்மாயில் வலியுறுத்தியுள்ளார்.

காரைதீவு பிரதேச சபையின் மாதாந்த அமர்வில் உரையாற்றிய அவர், மாளிகைக்காடு பள்ளிவாசல்கள் மற்றும் பொது அமைப்புகளின் சம்மேளனத்துடன் கடந்த சில தினங்களாக தொடர்ச்சியான கலந்துரையாடல்கள் நடத்தப்பட்டு வருவதாக தெரிவித்தார்.

அந்தக் கலந்துரையாடல்களின் அடிப்படையில், காரைதீவு பிரதேச சபை எல்லைக்குட்பட்ட மாளிகைக்காடு மேற்கு பகுதியில் மையவாடிக்காக பயன்படுத்தக்கூடிய காணியொன்று அடையாளம் காணப்பட்டுள்ளதாகவும், குறித்த காணியை மையவாடிக்காக பெற்றுக்கொள்வதற்கான சட்டரீதியான மற்றும் நிர்வாக நடவடிக்கைகளை பிரதேச சபை முன்னெடுக்க வேண்டும் என்றும் அவர் குறிப்பிட்டார்.

கடந்த மாவட்ட ஒருங்கிணைப்புக் குழுக் கூட்டத்தில் இது தொடர்பாக கருத்து தெரிவித்த பிரதேச சபை தவிசாளர், குறித்த காணி அரசாங்கத்தின் கீழுள்ள விவசாய காணியாக இருப்பதாக சம்பந்தப்பட்ட அதிகாரிகள் தெரிவித்துள்ளதாகவும், பொதுத் தேவைக்காக அதனைப் பெற்றுக்கொள்வதற்கு உரிய நடைமுறைகளைப் பின்பற்ற முடியும் எனவும் குறிப்பிட்டிருந்ததாக உப தவிசாளர் தெரிவித்தார்.

மேலும், குறித்த விடயம் தொடர்பில் சாதகமான சமிக்ஞை கிடைத்துள்ளதாகவும் தவிசாளர் தெரிவித்திருந்த நிலையில், அந்த வாய்ப்பை பயன்படுத்தி மாளிகைக்காடு மக்களுக்கான நிரந்தரத் தீர்வை பெற்றுக்கொடுக்க வேண்டும் எனவும் அவர் வலியுறுத்தினார்.

“மாளிகைக்காடு மக்களுக்கு மையவாடி என்பது சாதாரண தேவையல்ல. அது ஒரு அடிப்படை மனிதாபிமானத் தேவையாகும். ஒரு சமூகத்தின் இறந்தவர்களை கண்ணியத்துடனும் அவர்களின் மத உரிமைகளுடனும் நல்லடக்கம் செய்வதற்கான நிரந்தர இடம் அவசியமாகும்” என அவர் தெரிவித்தார்.

மாளிகைக்காடு மக்கள் அடையாளம் காட்டியுள்ள காணியை அடிப்படையாகக் கொண்டு பிரதேச சபை உடனடியாக நடவடிக்கை எடுக்க வேண்டும் என்றும், பிரதேச சபையின் தலைமையில் மாளிகைக்காடு பள்ளிவாசல்கள் மற்றும் பொது அமைப்புகளின் பிரதிநிதிகள், பிரதேச செயலக அதிகாரிகள் மற்றும் சம்பந்தப்பட்ட அரச நிறுவனங்களின் அதிகாரிகளை அழைத்து விசேட கலந்துரையாடலொன்றை நடத்த வேண்டும் என்றும் அவர் கோரிக்கை விடுத்தார்.

அத்துடன், காணியைப் பெற்றுக்கொள்வதற்கான நடைமுறைகள், அதற்கு தேவைப்படும் காலம் மற்றும் பெற வேண்டிய அனுமதிகள் குறித்து மக்களுக்கு தெளிவுபடுத்த வேண்டிய பொறுப்பு பிரதேச சபைக்கு இருப்பதாகவும் அவர் சுட்டிக்காட்டினார்.

“காணியை அரசாங்க ரீதியாகப் பெற்றுக்கொள்வது நீண்டகால நடைமுறையாக இருக்கலாம். ஆனால் நடைமுறை சிக்கலானது என்பதற்காக முயற்சியை கைவிட முடியாது. மாளிகைக்காடு மக்களுக்கு தீர்வு வேண்டும். அந்தத் தீர்வை பெற்றுக்கொடுப்பதற்கான நடைமுறையை காரைதீவு பிரதேச சபை உடனடியாக ஆரம்பிக்க வேண்டும்” என உப தவிசாளர் எம்.எச்.எம். இஸ்மாயில் தெரிவித்தார்.

இதேவேளை, கல்முனை வடக்கு ஆதார வைத்தியசாலையில் புதிதாக சுகாதார உதவியாளர்களாக நியமிக்கப்பட்ட முஸ்லிம் பெண் உத்தியோகத்தர்கள் கடமையைப் பொறுப்பேற்கச் சென்றபோது, அவர்களின் மத மற்றும் கலாச்சார உடை தொடர்பில் ஆட்சேபனை தெரிவிக்கப்பட்டு தடைகள் ஏற்படுத்தப்பட்டதாக தெரிவிக்கப்படும் சம்பவத்திற்கும் அவர் கடும் கண்டனம் தெரிவித்தார்.

அரச சேவையில் பணியாற்றும் ஒவ்வொருவருக்கும் தமது மத மற்றும் கலாச்சார அடையாளங்களைப் பேணுவதற்கான உரிமை இருப்பதாகவும், அதேவேளை அரச நிறுவனங்களின் சீருடை மற்றும் ஒழுங்குமுறைகளும் மதிக்கப்பட வேண்டிய நிலையில், இரண்டுக்கும் இடையில் சட்டரீதியான சமநிலையை ஏற்படுத்துவது அவசியம் என்றும் அவர் குறிப்பிட்டார்.

பொது நிர்வாக அமைச்சினால் வெளியிடப்பட்ட சுற்றறிக்கைகள் மற்றும் அரச சேவை ஆடை தொடர்பான விதிமுறைகளை அதிகாரிகள் உரிய முறையில் கவனத்தில் கொள்ள வேண்டும் எனவும் அவர் வலியுறுத்தினார்.

இந்த விவகாரத்தை ஒரு தனிநபரின் விருப்பு அல்லது வெறுப்பு என்ற அடிப்படையில் அணுக முடியாது என தெரிவித்த அவர், இது அரச சேவையில் சமத்துவம், மத சுதந்திரம், நிர்வாக நியாயம் மற்றும் சமூக நல்லிணக்கத்துடன் தொடர்புடைய முக்கியமான பிரச்சினை எனவும் குறிப்பிட்டார்.

“கடந்த காலங்களில் இனவாதமும் மதவாதமும் பல்வேறு பிரச்சினைகளை உருவாக்கியுள்ளன. அந்தக் கசப்பான அனுபவங்களில் இருந்து நாம் பாடம் கற்றுக்கொள்ள வேண்டும். இனங்களுக்கும் மதங்களுக்கும் இடையில் நல்லிணக்கத்தை கட்டியெழுப்ப வேண்டிய காலகட்டத்தில் அரச நிறுவனங்களுக்குள் இருந்து இன அல்லது மத அடையாளங்களை கேள்விக்குள்ளாக்கும் நடவடிக்கைகள் இடம்பெறுவது ஆபத்தானது” என அவர் தெரிவித்தார்.

அரசாங்கம் இனவாதத்திற்கும் மதவாதத்திற்கும் எதிரான நிலைப்பாட்டை வெளிப்படுத்தி வரும் நிலையில், அதற்கு முரணான வகையில் செயற்படும் அதிகாரிகள் தொடர்பில் அரசாங்கம் தீவிர கவனம் செலுத்த வேண்டும் என்றும் அவர் கோரிக்கை விடுத்தார்.

குறித்த சம்பவம் தொடர்பில், அதிகாரிகள் தமது அதிகாரத்தைப் பயன்படுத்தி ஒரு சமூகத்தின் மத அல்லது கலாச்சார உரிமையை கட்டுப்படுத்த முயன்றார்களா, அரச சுற்றறிக்கைகள் மற்றும் நிர்வாக விதிமுறைகள் மீறப்பட்டனவா, புதிதாக நியமிக்கப்பட்ட உத்தியோகத்தர்களை கடமையைப் பொறுப்பேற்கவிடாமல் தடுப்பதற்கு சட்டரீதியான அதிகாரம் இருந்ததா என்பன தொடர்பில் உரிய விசாரணை நடத்தப்பட வேண்டும் எனவும் அவர் வலியுறுத்தினார்.

“இது எந்த ஒரு சமூகத்தையும் எதிர்த்து முன்வைக்கப்படும் கோரிக்கை அல்ல. இது சட்டத்தின் ஆட்சியை பாதுகாப்பதற்கான கோரிக்கை. அரச சேவையில் சமத்துவத்தை உறுதி செய்வதற்கான கோரிக்கை. மத சுதந்திரத்தை பாதுகாப்பதற்கான கோரிக்கை. எமது பிரதேசத்தின் இன நல்லிணக்கத்தை பாதுகாப்பதற்கான கோரிக்கை” என உப தவிசாளர் எம்.எச்.எம். இஸ்மாயில் தெரிவித்தார்.

கல்முனை வடக்கு ஆதார வைத்தியசாலை சம்பவம் தொடர்பில் உடனடியாக விசாரணை நடத்தப்பட்டு உண்மை நிலை வெளிப்படுத்தப்பட வேண்டும் என்றும், தவறு செய்த அதிகாரிகள் இருப்பின் அவர்களுக்கு எதிராக உரிய ஒழுக்காற்று நடவடிக்கை எடுக்கப்பட வேண்டும் என்றும் அவர் கோரிக்கை விடுத்தார்.

“மாளிகைக்காடு மையவாடி பிரச்சினைக்கும், கல்முனை வடக்கு ஆதார வைத்தியசாலை பிரச்சினைக்கும் அடிப்படையில் தேவைப்படுவது மக்களின் உரிமைகளையும் கண்ணியத்தையும் மதிக்கும் நிர்வாகமே. இனவாதத்திற்கும் மதவாதத்திற்கும் இடமில்லாத, அனைத்து சமூகங்களும் சம உரிமையுடனும் கண்ணியத்துடனும் வாழக்கூடிய சமூகத்தை கட்டியெழுப்புவதே எமது இலக்காக இருக்க வேண்டும்” என அவர் மேலும் தெரிவித்தார்.

, ,

August 11, 2026

 



ஆலையடிவேம்பு நிருபர்


வி.சுகிர்தகுமார்         

 கிராமிய அபிவிருத்தி சமூக வலுவூட்டல் பிரதி அமைச்சர் வசந்த பியதிஸ்ஸவின் பன்முகப்படுத்தப்பட்ட வரவு செலவுத்திட்ட நிதியிலிருந்து பெறப்பட்ட கதிரைகள் அக்கரைப்பற்று கோளாவில் விநாயகர் மகாவித்தியாலயத்திற்கு இன்று (11) வழங்கி வைக்கப்பட்டது.
பிரதேச செயலாளர் ஆர்.திரவியராஜ் தலைமையில் இடம்பெற்ற நிகழ்வில் தேசிய மக்கள் சக்தியின் ஆலையடிவேம்பு பிரதேச இணைப்பாளர் ஆர்.ரதீசன் கலந்து கொண்டு கதிரைகளை பாடசாலை அதிபரிடம் கையளித்தார்.
நிகழ்வில் பிரதேச செயலக உதவித்திட்டமிடல் பணிப்பாளர் ஹூசைன்டீன் மற்றும் பிரஜா சக்தியின் தலைவர் சுதன் உள்ளிட்டவர்களும் கலந்து கொண்டனர்.
ஒரு இலட்சம் நிதியிலிருந்து பெறப்பட்ட கதிரைகளே இவ்வாறு வழங்கி வைக்கப்பட்டதுடன் இன்னும் பலபாடசாலைகளுக்கான உதவிகள் வழங்கி வைக்கப்படவுள்ளன.
, , ,

August 11, 2026

( வி.ரி.சகாதேவராஜா)
அரசாங்க ஊழியர்கள் கட்டாயம் அரசாங்க சட்டத்தை, சுற்றுநிருப நடைமுறையை மதித்து, அதன்படி பின்பற்ற வேண்டும். 
இதில் சாதி இனம் மதம் மொழி பேதம் கிடையாது.

இவ்வாறு கல்முனை ஆதார வைத்தியசாலை குழுத்  தலைவரும் பிரபல சமூக செயற்பாட்டாளரும்ன சந்திரசேகரம் ராஜன்  இன்று (11) தெரிவித்தார்.

கல்முனை ஆதார வைத்தியசாலையில் நிலவும் சுகாதார உதவியாளர்களின் சீருடைப் பிரச்சினை தொடர்பாக அவர் செய்தியாளர் மத்தியிலே  உரையாற்றியபோதே அவர் மேற்கண்டவாறு தெரிவித்தார் .

அவர் மேலும் தெரிவிக்கையில்

சீருடை அல்லது சீருடைக்கான கொடுப்பனவுகள் பெறும் உத்தியோகத்தர்கள் குறித்த சீருடையையே அணியவேண்டும். மேலும் அனுமதியளிக்கப்பட்ட சீருடையில் கடமையில் ஈடுபடுதல் வேண்டும் என பொது நிருவாக அமைச்சின்  13/2019(01) ஆம் இலக்க அரசாங்க சுற்று நிருபம்
தெளிவாக குறிப்பிட்டுள்ளது.

 அவர்களுக்கு ஏதேனும் சமய மரபுகளுக்கு இணங்க தமது உடைகளை அமைத்துக் கொள்வதற்கான சந்தர்ப்பம் இங்கு வழங்கப்படவில்லை எனவும் தெளிவாகக் கூறுகின்றது.

மேலும்,  சுகாதார சேவை திணைக்களத்தின் 176/2012  சுற்றுநிரூபம் அதற்கும் மேலாக 
 சுகாதார உதவியாளர்களுக்கான சீருடை தொடர்பாக சுகாதார திணைக்களத்தின் 07/2000 ஆம் இலக்க 28.06.2000 இல் வெளியிடப்பட்ட சிறப்பு நடைமுறை விளக்கமாக அளவு விதிகளுடன் அவர்களது சீருடை எவ்வாறு அமைய வேண்டும் என்பதை கோட்டுப் படத்துடனும் துல்லியமாக காட்டியுள்ளது.
இதில் எந்த சந்தேகமும் இல்லை.

இறுதியாக சுகாதார அமைச்சு சுகாதார உதவியாளர்கள் குழாத்தின்  சீருடைகளை திருத்தம் செய்தல் என்ற தலைப்பில் 2012 .11.30 இல் வெளிவந்த 02/176/2012 ஆம் இலக்க சுற்று நிருபத்தில் மிகவும் தெளிவாக  குறிப்பிடப்பட்டுள்ளது.

சீருடை அல்லது சீருடைக்கான கொடுப்பனவுகள் பெறும் உத்தியோகத்தர்கள் குறிப்பாக சுகாதார பிரிவினர் மற்றும் பாதுகாப்பு பிரிவினர் ஊதாரணமாக தாதியர்கள், சுகாதார உதவியாளர்கள், சாரதியினர்  தமது கடமையின் நிமித்தம் அங்கீகரிக்கப்பட்ட உடையினை அணிவதே அந்த சேவையினை செய்வதற்கான பொருத்தமான முறையாகும் என்பதுடன் தமது அடையாளங்கள் மூலமாக அவர்கள் இன,மத அடையாளங்களை பிரதிபலிக்காமல் எல்லா மக்களும் ஒன்றானவர்கள் என்ற நோக்கிலும் கடமைக்கு பொருத்தமான முறையிலும் அமைய வேண்டும் என்பதனாலேயே அதற்காக பிரேத்தியகமான அங்கீகரிக்கப்பட்ட ஆடையை அணிவதற்கு பணிக்கப்பட்டுள்ளனர். என்றும் தெளிவாக குறிப்பிடப்பட்டுள்ளது.

இந்த நிலையில் கல்முனை ஆதார வைத்தியசாலையின் நிருவாகம் சட்டப்படி அரச சட்டத்தை செயல்படுத்துகின்றது .இதில் யாருக்கும் அநீதி இழைக்கவில்லை. இனம் மதம் மொழி பேதம் பார்க்கவில்லை. இங்கு தமிழர் முஸ்லிம் சிங்களவர் அனைவரும் சந்தோஷமாக திருப்தியுடன் சேவையாற்றுகின்றனர். என்பதை அங்குள்ள குழுத் தலைவர் என்ற அடிப்படையில் நானும் ஆணித்தரமாக கூறுகின்றேன். 

சீருடைத் தொழில் என்று சொல்லப்படுகின்ற போலீஸ், முப்படையினர், பாதுகாப்பு,  பொதுச் சுகாதார பரிசோதகர்கள், தாதியர் , சுகாதார உதவியாளர்கள், எல்லாம் அந்தந்த குறித்த உடையை அணிய வேண்டுமே தவிர, அவரவர் கலாச்சார உடையை அணிய முடியாது. அப்படி எந்த சட்டத்திலும் கிடையாது. மத இன கலாச்சாரத்தை தங்கள் தங்கள் மத ஸ்தாபனங்களில் வைத்து கொள்ளலாம்.எனவே தேவையில்லாத இனமதவாத சிந்தனைகளை இதற்குள் திணித்து இனங்களிடையே வன்மத்தை விதைக்க வேண்டாம் என்று சம்பந்தப்பட்ட அனைவரையும் அன்பாக கேட்டுக்கொள்கிறேன்
, ,

August 07, 2026

 



நூருல் ஹுதா உமர்

பொதுப் போக்குவரத்துக்கு இடையூறு விளைவித்து, தொடர்ச்சியாக வீதி விபத்துகளுக்கும் விவசாயப் பயிர் சேதங்களுக்கும் காரணமாக இருந்து வந்த கட்டாக்காலி மாடுகளை சம்மாந்துறை பிரதேச சபை, சம்மாந்துறை பொலிஸாரின் ஒத்துழைப்புடன் விசேட நடவடிக்கையின் மூலம் பிடித்துள்ளது.

சம்மாந்துறை பிரதேச சபை எல்லைக்குட்பட்ட பகுதிகளில் கட்டாக்காலியாக விடப்பட்டு வீதிகளில் சுற்றித்திரிந்த மாடுகள் காரணமாக அன்றாடம் போக்குவரத்து பாதிக்கப்பட்டதுடன், வீதி விபத்துகள் அதிகரித்து வந்ததாகவும், விவசாயிகளின் பெறுமதிமிக்க பயிர்கள் சேதமடைந்து வருவதாகவும் பொதுமக்களிடமிருந்து பல்வேறு முறைப்பாடுகள் தொடர்ந்து கிடைத்ததை அடுத்து இந்த நடவடிக்கை மேற்கொள்ளப்பட்டதாக பிரதேச சபை தெரிவித்துள்ளது.

இதனையடுத்து, பிரதேச சபைகள் சட்டத்தின் கீழ் சம்மாந்துறை நகரப் பகுதியில் போக்குவரத்துக்கு இடையூறாக வீதிகளில் சுற்றித்திரிந்த கட்டாக்காலி மாடுகள் அடையாளம் காணப்பட்டு பிடிக்கப்பட்டன.

இது தொடர்பில் மாட்டு உரிமையாளர்களுக்கு பல தடவைகள் எச்சரிக்கை மற்றும் அறிவுறுத்தல்கள் வழங்கப்பட்ட போதிலும் அவை கவனத்தில் கொள்ளப்படாத காரணத்தினால் சட்ட நடவடிக்கைகள் மேற்கொள்ள வேண்டிய நிலை ஏற்பட்டதாகவும் பிரதேச சபை குறிப்பிட்டுள்ளது.

பிடிக்கப்பட்ட மாடுகளின் உரிமையாளர்கள் நிர்ணயிக்கப்பட்ட தண்டப்பணத்தை செலுத்தி தங்களது மாடுகளை மீளப் பெற்றுக்கொள்ளலாம் என்றும், ஒரு நாளுக்கு மேல் மாடுகளை பெற்றுக்கொள்ளாத பட்சத்தில் ஒவ்வொரு நாளுக்கும் பராமரிப்புச் செலவு மேலதிகமாக அறவிடப்படும் என்றும் அறிவிக்கப்பட்டுள்ளது.

அத்துடன், பிடிக்கப்பட்ட மாடுகளை மூன்று நாட்களுக்குள் உரிமையாளர்கள் பெற்றுக்கொள்ளத் தவறினால், அவற்றை சம்மாந்துறை பொலிஸார் ஊடாக நீதிமன்றத்தில் ஒப்படைத்து மேலதிக சட்ட நடவடிக்கை மேற்கொள்ளப்படும் என சம்மாந்துறை பிரதேச சபை தெரிவித்துள்ளது.

பொதுமக்களின் பாதுகாப்பையும், சீரான போக்குவரத்தையும் உறுதிப்படுத்தும் நோக்கில் இவ்வாறான நடவடிக்கைகள் தொடர்ந்தும் முன்னெடுக்கப்படும் எனவும், மாட்டு உரிமையாளர்கள் தங்களது கால்நடைகளை பொறுப்புடன் பராமரித்து வீதிகளில் கட்டாக்காலியாக விடுவதைத் தவிர்க்குமாறும் பிரதேச சபை கேட்டுக்கொண்டுள்ளது.

, , ,

August 07, 2026

 


நூருல் ஹுதா உமர்


தென்கிழக்கு பல்கலைக்கழகத்தின் பிரயோக விஞ்ஞான பீடத்திற்கு முன்பாக வீதி அபிவிருத்தி அதிகார சபையினால் முன்னெடுக்கப்பட்டு வரும் நடைபாதை அபிவிருத்திப் பணிகள் தொடர்பாக, சம்மாந்துறை பிரதேச சபையின் தவிசாளர் ஐ.எல்.எம். மாஹிர் அவர்கள் போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சுக்கு முன்வைத்த கோரிக்கையைத் தொடர்ந்து, வீதி அபிவிருத்தி அதிகார சபையின் வீதி பராமரிப்பு மற்றும் முகாமைத்துவப் பிரிவின் பிரதிப் பணிப்பாளர் நாயகம் ஆர்.எம்.பி. ரத்நாயக்க அவர்கள் நேற்று (06) சம்மாந்துறைக்கு நேரடியாக விஜயம் மேற்கொண்டு கள ஆய்வில் ஈடுபட்டார்.

இதன்போது, தென்கிழக்கு பல்கலைக்கழகத்தின் பிரயோக விஞ்ஞான பீடத்திற்கு முன்பாக தற்போது முன்னெடுக்கப்பட்டு வரும் நடைபாதை அபிவிருத்திப் பணிகள் நேரில் பார்வையிடப்பட்டதுடன், மாணவர்கள் மற்றும் பொதுமக்களின் பாதுகாப்பை மேலும் உறுதிப்படுத்தும் வகையில் நடைபாதையை விரிவுபடுத்துவது குறித்தும் ஆராயப்பட்டது.

மேலும், மோட்டார் சைக்கிள்களுக்கென தனியான பாதையை அமைப்பது, எதிர்கால போக்குவரத்து தேவைகளுக்கு ஏற்ப வீதி கட்டமைப்பை மேம்படுத்துவது, ஹிஜ்றா சந்தி சுற்றுவட்ட அபிவிருத்தித் திட்டத்தை முன்னெடுப்பது மற்றும் ஹிஜ்றா சந்தியிலிருந்து அல்-மர்ஜான் முஸ்லிம் மகளிர் கல்லூரி வரை உள்ள பிரதான வீதியை நான்கு வழிப்பாதையாக அபிவிருத்தி செய்வது தொடர்பாகவும் விரிவான கலந்துரையாடல் இடம்பெற்றது.

இவ்வாறான அபிவிருத்தித் திட்டங்கள் நிறைவேற்றப்படுவதன் மூலம் தென்கிழக்கு பல்கலைக்கழக மாணவர்கள், கல்வி மற்றும் அரச நிறுவனங்களுக்குச் செல்லும் பொதுமக்கள் உள்ளிட்ட ஆயிரக்கணக்கான வீதிப் பயனாளர்களின் பாதுகாப்பு மற்றும் போக்குவரத்து வசதிகள் கணிசமாக மேம்படும் என அதிகாரிகள் தெரிவித்தனர்.

இந்த கள ஆய்வு மற்றும் கலந்துரையாடலில் வீதி அபிவிருத்தி அதிகார சபையின் அக்கரைப்பற்று அலுவலகத்தின் பிரதம பொறியியலாளர் கே.எல்.எம். இஸ்மாயில், கல்முனை அலுவலகத்தின் நிறைவேற்று பொறியியலாளர் இசட்.ஏ.எம். அஸ்மீர், சம்மாந்துறை பிரதேச சபையின் உறுப்பினர்களான ஏ.எச்.எம். காலித், எம்.ஆர். ஆஷிக் முஹம்மட், எம்.ஐ.எம். றிஸ்வி கான், பிரதேச சபையின் தொழில்நுட்ப உத்தியோகத்தர்களான எம்.எம்.எம். முஸ்தபா, ரீ. சங்கீதன், வீதி அபிவிருத்தி அதிகார சபையின் பொறியியலாளர்கள் மற்றும் அதிகாரிகள் பலரும் கலந்து கொண்டனர்.
, , ,

August 07, 2026

 


சம்மாந்துறை விவசாய போதனாசிரியர் பிரிவில் ( மாகாண)தேனீ வளர்ப்பு தொடர்பான செயன்முறை பயிற்சியுடன் கூடிய விழிப்புணர்வு கருத்தரங்கு சம்மாந்துறையில் நடைபெற்றது.


அம்பாரை மாவட்ட மாகாண விவசாய திணைக்களத்தின் பிரதி விவசாய பணிப்பாளர் பி.திஸ்ஸநாயக்க மற்றும் சம்மாந்துறை வலய உதவி விவசாய பணிப்பாளர் எஸ்.பரமேஸ்வரனின் வழிகாட்டலில் சம்மாந்துறை - மேற்கு விவசாய போதனாசிரியர் எம்எச்.முர்ஷிதா ஷிரீன் தலைமையில் விவசாய தொழில்நுட்ப உதவியாளர் ஆர்.ரஜிரேகா  ஏற்பாட்டில் மாகாண விவசாய விரிவாக்க நிலையம்,
சம்மாந்துறை.
( சம்மாந்துறை,தொழில்நுட்ப கல்லூரிக்கு முன்னால் உள்ள ஓய்வூதிய நலன்புரி சமூக சேவை சபைக் கட்டிடம்)
 இடம்பெற்றது.

தேனீ வளர்ப்பின் முக்கியத்துவம், நன்மைகள்,தேனீ பராமரிப்பு மற்றும் முகாமைத்துவ நடவடிக்கைகள்,தேனீ பெட்டியின் பாகங்கள் மற்றும் அதன் பயன்கள்,பாதுகாப்பு முறைமைகள், தேன்  அறுவடை, தேன் பிரித்தெடுப்பு மற்றும் களஞ்சியப்படுத்தல் என அனைத்து விடயங்களும் செயன்முறை உடன் விபராமாக தெளிவூட்டப்பட்டது.

இந்நிகழ்வில் சம்மாந்துறை - மேற்கு விவசாய போதனாசிரியர் முர்ஷிதா ஷீரீன்,சம்மாந்துறை - கிழக்கு விவசாய போதனாசிரியர் பி. ராஜகருணா, தொழில்நுட்ப உதவியாளர் ஆர்.ரஜிரேகா மற்றும் சம்மாந்துறையைச் சேர்ந்த முன்னோடி விவசாயிகளும் கலர்ந்து கொண்டனர்.
, , ,

August 03, 2026



பாறுக் ஷிஹான்

வடிகான் அமைப்புகள் அடைபட்டதால் வீதிகள் நீரில் மூழ்கின; பொதுமக்கள் அசௌகரியம்!


சாய்ந்தமருது மற்றும் அதன் அதனைச் சுற்றியுள்ள உள்ளூர் பகுதிகளில் தொடர்ச்சியாகப் பெய்து வரும் அடைமழை காரணமாக, பல பிரதான மற்றும் உட்புற வீதிகளில் வெள்ளநீர் தேங்கியுள்ளது.

ஞாயிற்றுக்கிழமை (2) மாலை மழைநீரானது வடிகான்கள் வழியே முறையாக வழிந்தோட வழியின்மையினாலேயே பெரும்பாலான வீதிகள் நீரில் மூழ்கியுள்ளதாகப் பிரதேசவாசிகள் தெரிவிக்கின்றனர்.

இதனால் பாதசாரிகள், பாடசாலை மாணவர்கள் மற்றும் வாகனச் சாரதிகள் பாரிய அசௌகரியங்களை எதிர்நோக்கி வருவதோடு, அன்றாடக் காரியங்களை மேற்கொள்வதிலும் பெரும் சிரமங்கள் ஏற்பட்டுள்ளன.

முறைசாரா வடிகான் அமைப்புகள் மற்றும் அடைபட்டுள்ள நீர்வரத்து வழிகளை உடனடியாகச் சீரமைத்து, தேங்கியுள்ள வெள்ளநீரை அகற்றுவதற்குப் பிரதேச சபையும் உரிய அதிகாரிகளும் விரைந்து நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.

, , ,

August 03, 2026

 


சம்மாந்துறை ஆதார வைத்தியசாலையில் இரு தினங்களாக நடாத்தப்பட்ட விசேட இலவச கண்புரை சத்திரசிகிச்சை முகாமில், சுமார் 550 நோயாளர்களுக்கு வெற்றிகரமாகச் சத்திரசிகிச்சைகள் மேற்கொள்ளப்பட்டு மறுவாழ்வு அளிக்கப்பட்டுள்ளது.


கிழக்கு மாகாணத்தின் சுகாதார வரலாற்றிலேயே மிகச் சிறப்புமிக்க ஒரு நிகழ்வாகக் கருதப்படும் இம்முகாம், சம்மாந்துறை ஆதார வைத்தியசாலை அபிவிருத்திக் குழுவின் ஏற்பாட்டில் Sammanthurai Golden City Lions Club, NAJA Residency, மரியம் Filling Station மற்றும் Farook Filling Station ஆகிய அமைப்புகளின் இணை அனுசரணையில் கடந்த ஆகஸ்ட் 1 மற்றும் 2 ஆம் திகதிகளில் மிகப்பிரமாண்டமாக நடைபெற்று முடிந்தது.

இலங்கை கண் மருத்துவக் கல்லூரியைச் சேர்ந்த விசேட கண் மருத்துவ நிபுணர்கள் நேரடியாக வருகை தந்து இச்சத்திர சிகிச்சைகளை மேற்கொண்டனர்.

இரு கட்டங்களாக முன்னெடுக்கப்பட்ட சிகிச்சைகள்

இச்சிகிச்சை முகாமின் முதற்கட்டமாக ஆகஸ்ட் 01 ஆம் திகதியன்று 300 நோயாளர்களுக்கும், அதனைத் தொடர்ந்து ஆகஸ்ட் 02 ஆம் திகதியன்று 250 நோயாளர்களுக்கும் கட்டம் கட்டமாகச் சத்திர சிகிச்சைகள் வெற்றிகரமாக முன்னெடுக்கப்பட்டன.

மருத்துவக் குழுவினருக்கு விசேட கௌரவிப்பு
, ,

August 01, 2026

பாறுக் ஷிஹான்

சாய்ந்தமருது கடற்கரை வீதியில் அமைந்துள்ள உணவகம் ஒன்றில் இன்று (01)  திடீரெனப் பாரிய தீ விபத்து ஏற்பட்டுள்ளது.

சம்பவம் தொடர்பில் தெரியவருவதாவது, குறித்த உணவகத்தில் காலை வேளையில் திடீரெனத் தீ பரவியதையடுத்து, அங்கிருந்தவர்களும் பிரதேசவாசிகளும், சாய்ந்தமருது ஜனாஸா நலன்புரி மக்கள் பேரவையின் களப் பணியாளர்கள் இணைந்து தீயைக் கட்டுப்பாட்டுக்குள் கொண்டுவரும் நடவடிக்கைகளில் ஈடுபட்டனர்.

இருப்பினும், இத்தீவிபத்து தொடர்பில் கல்முனை மாநகர சபையின் தீயணைப்புப் பிரிவுக்கு உடனடியாகத் தகவல் வழங்கப்பட்ட போதிலும், வழமை போன்று தீ முழுமையாகக் கட்டுப்பாட்டுக்குள் கொண்டுவரப்பட்ட பின்னரே தீயணைப்புப் படையினர் சம்பவ இடத்திற்கு வருகை தந்ததாக அப்பகுதி மக்கள் கடும் குற்றச்சாட்டை முன்வைக்கின்றனர்.

மாநகரசபையின் தீயணைப்புப் பிரிவினரின் இத்தகைய தொடர்ச்சியான தாமதமான வருகை மற்றும் மந்தமான செயற்பாடுகள் குறித்துப் பொதுமக்கள் மற்றும் வர்த்தகர்கள் மத்தியில் தீவிர அதிருப்தி நிலவி வருகின்றது.

இவ்வாறான விபத்துச் சமயங்களில் விரைந்து செயற்படும் வகையில் கல்முனை மாநகர சபையின் தீயணைப்புச் சேவையை வினைத்திறனுள்ளதாக மாற்றியமைக்க உரிய அதிகாரிகள் உடனடியாக நடவடிக்கை எடுக்க வேண்டும் என அப்பகுதி மக்கள் கோரிக்கை விடுக்கின்றனர்.

இத்தீ விபத்துக்கான காரணம் மற்றும் ஏற்பட்ட சேத விபரங்கள் குறித்த மேலதிக விசாரணைகளைப் சாய்ந்தமருது பொலிஸார் மேற்கொண்டு வருகின்றனர்


, ,

August 01, 2026


 பாறுக் ஷிஹான்


அம்பாறை மாவட்டத்தின் தீகவாபி பிரதேசத்தில் அறுவடைக்குத் தயாரான நிலையில் காணப்பட்ட பல ஏக்கர் நெல் வயல்கள் காட்டு யானைகளின் தாக்குதலினால் முற்றாகச் சேதமடைந்துள்ளன.

இரவு வேளையில் காட்டுப்பகுதியிலிருந்து கிராமத்திற்குள் புகும் காட்டு யானைக் கூட்டங்கள், அறுவடைக்குத் தயாராகவுள்ள பயிர்ச் செய்கைகளுக்குள் புகுந்து நெற்பயிர்களை உட்கொண்டதுடன், அவற்றை மிதித்து நாசப்படுத்தியுள்ளதாகப் பாதிக்கப்பட்ட விவசாயிகள் கவலை தெரிவிக்கின்றனர்.

வங்கிக் கடன்களைப் பெற்றுப் பெரும் சிரமத்திற்கு மத்தியில் மேற்கொள்ளப்பட்ட பயிர்ச்செய்கைகள், அறுவடைக்குச் சில நாட்களே உள்ள நிலையில் இவ்வாறு நாசமாகியுள்ளமையினால் தம்மைப் பாரிய பொருளாதார நெருக்கடிக்கு உள்ளாக்கியுள்ளதாக விவசாய சமூகத்தினர் சுட்டிக்காட்டுகின்றனர்.

இப்பகுதியில் தொடர்ந்து அதிகரித்துவரும் காட்டு யானைகளின் அச்சுறுத்தலைக் கட்டுப்படுத்த வனஜீவராசிகள் திணைக்கள அதிகாரிகள் உடனடியாக நடவடிக்கை எடுக்க வேண்டும் எனவும், சேதமடைந்த பயிர்களுக்கு உரிய இழப்பீட்டை பெற்றுத்தர அதிகாரிகள் முன்வர வேண்டும் எனவும் அப்பகுதி மக்கள் கோரிக்கை விடுக்கின்றனர்.
, ,

July 28, 2026


 நூருல் ஹுதா உமர்


மோசடிகளைத் தடுக்கும் சட்டக் கட்டளைச் சட்டம் (Prevention of Fraud Ordinance) மற்றும் நொத்தாரிசுகள் சட்டக் கட்டளைச் சட்டத்தின் (Notaries Ordinance) கீழ், நிலம் தொடர்பான எந்தவொரு உறுதியும், தகுதியும் உரிமமும் பெற்ற பிரசித்தி பெற்ற நொத்தாரிசு அல்லது நொத்தாரிசு உரிமம் கொண்ட சட்டத்தரணிகள் முன்னிலையிலேயே நிறைவேற்றப்பட வேண்டும். மாறாக, ஒரு நொத்தாரிசின் கிளாக் அல்லது சட்டவிரோத முகவர்கள் முன்போ உறுதிகளை நிறைவேற்றினால், அவை சட்டப்படி போலி உறுதிகளாகவே கருதப்படும் என சாய்ந்தமருது நொத்தாரிசுகள் கூட்டாக எச்சரிக்கை விடுத்துள்ளனர்.

அவர்கள் கூட்டாக வெளியிட்டுள்ள அறிக்கையில், சாய்ந்தமருது பகுதியில் பலர் தமக்கு நொத்தாரிசு உரிமம் இல்லாதிருந்தும், தம்மை நொத்தாரிசு எனக் பொய்கூறி நம்ப வைத்தோ அல்லது நொத்தாரிசு கிளாக் என அடையாளப்படுத்தியோ சட்டவிரோதமாக உறுதிகளை நிறைவேற்றி வருகின்றனர். இவ்வாறான ஏமாற்றுப் பேர்வழிகள் பணத்தை உறிஞ்சும் நோக்கில் செய்யும் நடவடிக்கைகளால், பொதுமக்கள் தங்களின் சிறுகச் சிறுகச் சேர்த்த பெருந்தொகை பணத்தை வழங்கி வாங்கிய நிலங்களை சட்டப்படி இழக்கும் அபாயம் ஏற்பட்டுள்ளது. இத்தகைய சட்டவிரோத செயற்பாடுகளில் சில அரசு ஊழியர்களும் ஈடுபட்டு வருவது அவதானிக்கப்பட்டுள்ளதாக அவர்கள் சுட்டிக்காட்டியுள்ளனர்.

நொத்தாரிசு பெயர் பலகை இல்லாத இடங்களில் உறுதிகளை எழுதுவது முற்றிலும் முறையற்றதும் சட்டவிரோதமானதும் ஆகும். உறுதி நிறைவேற்றப்படும் முன்னர், சம்பந்தப்பட்ட நபர் பிரசித்தி பெற்ற நொத்தாரிசாக அல்லது உரிமம் பெற்ற சட்டத்தரணியாக உள்ளாரா என்பதை பொதுமக்கள் உறுதிப்படுத்திக் கொள்ள வேண்டும். இடைத்தரகர்கள் அல்லது எழுத்தர்களிடம் நேரடியாகப் பணத்தைக் கொடுத்து சான்றிதழ் அற்ற உறுதிகளைப் பெறுவதைத் தவிர்க்க வேண்டும். பொதுமக்கள் தங்களின் வாழ்நாள் சொத்துக்களைப் பாதுகாத்துக் கொள்ள விழிப்புணர்வுடன் செயல்படுமாறு சாயந்தமருது பிரதேசப் பிரசித்தி பெற்ற நொத்தாரிசுகள் தங்களது கூட்டு அறிக்கையில் வலியுறுத்தியுள்ளனர்.

, ,

July 28, 2026


 (வி.ரி.சகாதேவராஜா)

​
அரசாங்கத்தின் நெல் கொள்வனவு திட்டம் சம்மாந்துறை பிரதேச செயலகப் பிரிவில் நேற்று (27) திங்கள் கிழமை உத்தியோகபூர்வமாக ஆரம்பித்து வைக்கப்பட்டன.
​
சம்மாந்துறை பிரதேச செயலாளர் எஸ். எல். முஹம்மது ஹனீபா நெல் கொள்வனவு நிலையத்திற்கு நேரில் களவிஜயம் செய்தார்.

அங்கு அவர் கொள்வனவுச் செயற்பாடுகள், நெல்லின் தரம் மற்றும் ஈரப்பத அளவு ஆகியவற்றை நேரில் சென்று பார்வையிட்டு ஆய்வு செய்தார்.
​
 பிரதேசத்தின் பல பாகங்களில் இருந்தும் வருகை தந்த விவசாயிகள் தங்களது நெல் அறுவடைகளை அரசாங்கத்தின் உத்தரவாத விலையில் ஒப்படைத்தனர்.

இதேவேளை, திருக்கோவில் பிரதேச செயலகத்தின் கீழ் தம்பட்டை 02  நெற்களஞ்சிய சாலையில் அரசாங்கத்தின் 2026 சிறு போக நெல் கொள்முதல் வேலைத்திட்டம் நேற்றுமுன்தினம் ஆரம்பித்து வைக்கப்பட்டது.

 திருக்கோவில் பிரதேச செயலாளர் தங்கையா கஜேந்திரன்  தலைமையில் இடம்பெற்ற நிகழ்வில்
 பிரதம அதிதியாக கரையோர பிரதேச செயலகங்களின் ஒருங்கிணைப்புக் குழுத் தலைவரும், நாடாளுமன்ற உறுப்பினருமான ஏ.ஆதம்பாவா  மற்றும் அம்பாறை மாவட்ட   செயலாளர் அனுபமா மங்கள விக்ரமராச்சி கலந்துகொண்டு ஆரம்பித்தது வைத்தனர்.

Subscribe to: Posts (Atom)

இணையவழி,குறுந்தகவல் மூலமாக, பொருட்களைச்,சந்தைப்படுத்துங்கள்! On WEB-ceylon24.com On Twitter @ceylon24 Tel:0777 761 477, 0759 761 477

Powered by Blogger.