Showing posts with label Eastern Sri Lanka. Show all posts
, ,

September 01, 2026


 நூருல் ஹுதா உமர்


நீதி மற்றும் தேசிய ஒருமைப்பாட்டு அமைச்சின் கீழ் இயங்கும் தேசிய ஒருமைப்பாடு மற்றும் நல்லிணக்கத்திற்கான அலுவலகத்தின் (ONUR) ஒத்துழைப்புடன், வேள்வி பெண்கள் அபிவிருத்தி ஒன்றியத்தினால் அம்பாறை மாவட்டத்தில் பல்லின மக்களிடையே சமூக சகவாழ்வு மற்றும் நல்லிணக்கத்தை மேம்படுத்தும் செயற்றிட்டம் முன்னெடுக்கப்பட்டு வருகின்றது.

இதன் அடிப்படையில், கல்முனை பிரதேச செயலகப் பிரிவுக்குட்பட்ட கமு/கமு/அல்-பஹ்ரியா மகா வித்தியாலயத்தில் தரம் 10 மற்றும் 11 மாணவர்களுக்கான சமூக நல்லிணக்கம் தொடர்பான விழிப்புணர்வு கருத்தரங்கு நடைபெற்றது.

பாடசாலையின் அதிபர் எம்.எஸ்.எம். பைசல் அவர்களின் தலைமையில் நடைபெற்ற இக்கருத்தரங்கில், இலங்கை மனித உரிமைகள் ஆணைக்குழுவின் கல்முனை பிராந்திய இணைப்பாளர் ஜனாப் ஏ.சி.ஏ. அசிஸ் அவர்கள் வளவாளராகக் கலந்து கொண்டு சமூக நல்லிணக்கம், மொழி உரிமைகள், சுற்றாடல் பாதுகாப்பு மற்றும் பாலின சமத்துவம் ஆகிய விடயங்கள் தொடர்பாக மாணவர்களுக்கு விரிவான விளக்கங்களை வழங்கினார். மேலும், சமூகத்தில் நல்லிணக்கம் மற்றும் சகவாழ்வை கட்டியெழுப்புவதில் மாணவர்களின் பங்களிப்பு, பொறுப்பு மற்றும் முக்கியத்துவம் குறித்தும் எடுத்துரைத்தார்.
, , ,

August 28, 2026

 


நூருல் ஹுதா உமர்


மழைக்காலம் ஆரம்பிக்கவுள்ள நிலையில், காரைதீவு பிரதேச சபைக்குட்பட்ட மாளிகைக்காடு பகுதியில் மழைநீர் தேங்குவதைத் தடுக்கும் வகையில் வடிகான்களை துப்புரவு செய்யும் பணிகள் ஆரம்பிக்கப்பட்டுள்ளன.

காரைதீவு பிரதேச சபையின் முன்னாள் உப தவிசாளரும், தற்போதைய உறுப்பினருமான ஏ.எம். ஜாஹீர் விடுத்த வேண்டுகோளின் பேரில் இத்துப்புரவுப் பணிகள் முன்னெடுக்கப்பட்டு வருகின்றன.

காரைதீவு பிரதேச சபை தவிசாளர் சுப்ரமணியம் பாஸ்கரனின் ஆலோசனை மற்றும் வழிகாட்டலின் கீழ், பிரதேச சபை ஊழியர்களினால் வடிகான்களில் தேங்கியுள்ள குப்பைகள், மண் மற்றும் நீரோட்டத்திற்கு இடையூறாக காணப்படும் கழிவுகள் என்பன அகற்றப்பட்டு வருகின்றன.

மழைக்காலங்களில் வடிகான்கள் முறையாக பராமரிக்கப்படாததன் காரணமாக வீதிகள் மற்றும் குடியிருப்புப் பகுதிகளில் மழைநீர் தேங்குவதுடன், பொதுமக்கள் பல்வேறு அசௌகரியங்களை எதிர்கொள்ளும் நிலை ஏற்படுகின்றது. இதனை கருத்திற்கொண்டு, மழைக்காலத்திற்கு முன்னதாகவே வடிகான்களை துப்புரவு செய்யும் நடவடிக்கை மேற்கொள்ளப்பட்டுள்ளதாக தெரிவிக்கப்படுகிறது.

மாளிகைக்காடு உள்ளிட்ட காரைதீவு பிரதேச சபைக்குட்பட்ட பகுதிகளில் மழைநீர் தேங்குவதைத் தடுப்பதற்கும், பொதுமக்களின் பாதுகாப்பான போக்குவரத்து மற்றும் சுகாதாரச் சூழலை உறுதி செய்வதற்கும் இவ்வாறான துப்புரவுப் பணிகள் தொடர்ந்தும் முன்னெடுக்கப்படவுள்ளதாக தவிசாளர் சுப்ரமணியம் பாஸ்கரன் தெரிவித்தார்.
 
, ,

August 24, 2026

 


 (எம்.என்.எம்.அப்ராஸ்) 

சர்வதேச மனித உரிமைகள் உலகளாவிய மிஷன் (INTERNATIONAL HUMAN RIGHTS GLOBAL MISSION)அமைப்பின் கலந்துரையாடல் சாய்ந்தமருதில் நேற்று(23)இடம்பெற்றது. 

சர்வதேச மனித உரிமைகள் உலகளாவிய மிஷன்(INTERNATIONAL HUMAN RIGHTS GLOBAL MISSION)அமைப்பின் தேசிய தலைவர் ஏ.ஆர்.அமீர்கான் அவர்களின் வழிகாட்டலில் அமைப்பின் பணிப்பாளர் எஸ்.எல்.றசீட் மற்றும் பிரதி பணிப்பாளர்களான எம்.ஐ.அப்ரோஸ்,எம்.பி.நூமைசா, எஸ்.எப்.சஹானி ஆகியோரின் ஒருங்கிணைப்பில் இடம்பெற்றது. 

 இதன் போது அமைப்பின் நோக்கம் மற்றும் எதிர்கால செயற்பாடுகள் பற்றி கலந்துரையாடப்பட்டது. 

மேலும் அம்பாரை மாவட்டத்தில் பொது மக்களின் சமூக நல சார் விடயங்களை மேம்படுத்தும் வகையில் திட்டங்களை முன்னெடுத்து செல்லுதல்,கல்முனை பிரதேசத்தில் இரத்ததான முகாம்,சுற்று சூழலை சுத்தமாக வைத்திருக்கும் முகமாக விழிப்புணர்வு நிகழ்வுகள் மற்றும் சிரமதானபணிகள் மேற்கொள்ளல் நல்லிணக்க செயற்பாடுகள்,மாணவர்களின் கல்வி நடவடிக்கைகளை மேம்படுத்தும் வேலைத் திட்டங்கள் என்பன இடம்பெற இதன் போது தீர்மானிக்கப்பட்டது . 

 சர்வதேச மனித உரிமைகள் உலகளாவிய மிஷன் (International Human Rights Global Mission – IHRGM) அமைப்பின் பிரதி பணிப்பாளர்களான எம். எச்.எப்.சாஹானா பானு,எம்.எப்.எப்.அக்ஸா இணைப்பாளர்களான ஜே.எப்.சுஜிமா, எம்.ஆர்.எம்ரோசான்,எம்.ஏ.சி.எம். பாயிஸ் கரீம்,ஏ.எம்.எப். ரிபா,ஆர்.எம்.ரூமி, ஐ.ஜாபீர்,அங்கத்தவரான செயின் நௌபல் ஆகியோர் இதன் போது கலந்து கொண்டனர்.

, , , , ,

August 19, 2026

 


பிரதேச செயலாளரை கடமை நேரத்தில் அச்சுறுத்திய பெண் அரச உத்தியோகத்தர் கைது: அதிர்ச்சியில் மயங்கி விழுந்து வைத்தியசாலையில் அனுமதி


பாறுக் ஷிஹான்

நிந்தவூர் பிரதேச செயலாளரை கடமை நேரத்தில் அச்சுறுத்திய குற்றச்சாட்டின் பேரில் பெண் அரச உத்தியோகத்தர் ஒருவர் நிந்தவூர் பொலிஸாரால் கைது செய்யப்பட்டுள்ளதுடன், கைது செய்யப்பட்ட வேளையில் அதிர்ச்சியால் மயங்கி விழுந்த நிலையைத் தொடர்ந்து பொலிஸ் பாதுகாப்புடன் வைத்தியசாலையில் அனுமதிக்கப்பட்டுள்ளார்.

அம்பாறை மாவட்டம் நிந்தவூர் பிரதேச செயலாளரை அவரது கடமையின் போது குறித்த பெண் உத்தியோகத்தர் காணொளி (Video) எடுத்து அச்சுறுத்தல் விடுத்ததுடன், அக்காணொளியை சமூக வலைத்தளமான முகநூலிலும் பதிவேற்றம் செய்திருந்தார்.

இச் சம்பவம் தொடர்பில் நிந்தவூர் பிரதேச செயலக நிர்வாகத்தினரால் நிந்தவூர் பொலிஸ் நிலையத்தில் உத்தியோகபூர்வமாக முறைப்பாடு ஒன்று பதிவு செய்யப்பட்டிருந்தது.

அம்முறைப்பாட்டிற்கு அமைவாக, செவ்வாய்க்கிழமை (18) மாலை வாக்குமூலம் ஒன்றைப் பெற்றுக்கொள்வதற்காகக் குறித்த பெண் அரச உத்தியோகத்தர் நிந்தவூர் பொலிஸ் நிலையத்திற்கு அழைக்கப்பட்டிருந்தார்.

விசாரணைகளின் பின்னர் பொலிஸாரால் அவர் கைது செய்யப்பட்ட வேளையில், திடீரென மயக்கமுற்று கீழே விழுந்துள்ளார்.

இதனைத் தொடர்ந்து, அவர் உடனடியாக அருகில் உள்ள நிந்தவூர் ஆதார வைத்தியசாலைக்கு அவசர சிகிச்சைகளுக்காக அனுமதிக்கப்பட்டுள்ளார். தற்போது அவருக்குப் பெண் பொலிஸாரின் பாதுகாப்புடன் வைத்தியசாலையில் சிகிச்சையளிக்கப்பட்டு வருவதுடன், நிந்தவூர் பொலிஸார் மேலதிக விசாரணைகளை முன்னெடுத்து வருகின்றனர்.

,

August 18, 2026

 


(நூருல் ஹுதா உமர்)


இறக்காமம் பிரதேச செயலகத்தில் நீண்டகாலமாக வெற்றிடமாகக் காணப்பட்ட மேலதிக மாவட்ட பதிவாளர் பதவிக்கு, அண்மையில் நடைபெற்ற போட்டிப் பரீட்சையில் சித்தியடைந்து புதிதாக நியமனம் பெற்ற மருதமுனையைப் பிறப்பிடமாகக் கொண்ட எஸ்.எம். சுஜாத் அவர்கள், 2026.08.17 திங்கட்கிழமை, இறக்காமம் பிரதேச செயலகத்தில் பிரதேச செயலாளர் அஷ்-ஷெய்க் எம்.எஸ்.எம்.றஸ்ஸான் (நளீமி) அவர்களின் முன்னிலையில் தனது கடமைகளைப் பொறுப்பேற்றுக் கொண்டார்.

இந்நிகழ்வில் உதவிப் பிரதேச செயலாளர் அய்மா நிஃமத்துல்லாஹ், பிரதித் திட்டமிடல் பணிப்பாளர் கே.எல். ஹம்சார், நிருவாக உத்தியோகத்தர் ஐ.எல்.எம். றசாக் உள்ளிட்ட உத்தியோகத்தர்களும், புதிதாக நியமனம் பெற்ற மேலதிக மாவட்ட பதிவாளர் அவர்களின் குடும்ப உறுப்பினர்களும் கலந்து கொண்டனர்.

இதன்போது, புதிய பதவியில் சிறப்பாகப் பணியாற்றி, பொதுமக்களுக்கு சிறந்ததும் வினைத்திறன்மிக்கதுமான சேவையை வழங்க எஸ்.எம். சுஜாத் அவர்களுக்கு பிரதேச செயலாளர் அவர்கள் தனது வாழ்த்துக்களையும் பாராட்டுக்களையும் தெரிவித்துக் கொண்டார்.
, , ,

August 14, 2026

 


பாறுக் ஷிஹான்


 
அம்பாறை – வீரமுனைக் கிராமத்தில் கடந்த 1990 ஆம் ஆண்டு கொடூரமான முறையில் படுகொலை செய்யப்பட்ட 232 அப்பாவித் தமிழ் மக்களின் 36 ஆம் ஆண்டு நினைவேந்தல் நிகழ்வு  வீரமுனை நினைவுத் தூபியில் உணர்வுப்பூர்வமாக அனுஷ்டிக்கப்பட்டது.

நினைவேந்தல் நிகழ்வின்போது  அம்பாறை வீரமுனை ஸ்ரீ சிந்தா யாத்திரைப் பிள்ளையார் ஆலயத்திற்கு முன்பாக அமைக்கப்பட்டுள்ள நினைவுத் தூபிக்கு மலர் மாலை அணிவிக்கப்பட்டதுடன், படுகொலை செய்யப்பட்ட உறவுகளை நினைவுகூர்ந்து சுடரேற்றி ஒரு நிமிட மௌன அஞ்சலியும் செலுத்தப்பட்டது.

கடந்த அசாதாரண யுத்த சூழ்நிலை காரணமாக, சம்மாந்துறை பிரதேசத்தில் நிகழ்ந்த வன்செயல்களினால் அஞ்சிய வீரமுனை மற்றும் அதன் சுற்றுவட்டக் கிராமங்களான வீரச்சோலை, மல்லிகைத்தீவு, மல்வத்தை, வளத்தாப்பிட்டி, சொறிக்கல்முனை, அம்பாறை பகுதிகளைச் சேர்ந்த பல நூற்றுக்கணக்கான பொதுமக்கள், பாதுகாப்புத் தேடி வீரமுனை சிந்தா யாத்திரைப் பிள்ளையார் கோயில் வளவினுள்ளும் வீரமுனை இராமகிருஷ்ண மிஷன் பாடசாலை வளாகத்திலும் தஞ்சம் புகுந்திருந்தனர்.

அவ்வாறு தஞ்சம் புகுந்திருந்த வேளையில், கடந்த 1990 ஆம் ஆண்டு ஆகஸ்ட் மாதம் 12 ஆம் திகதி புகுந்த ஆயுததாரிகளால் 232 பொதுமக்கள் சுட்டும் வெட்டியும் கொடூரமாகப் படுகொலை செய்யப்பட்டனர்.

இச்சம்பவம் இடம்பெற்று 36 ஆண்டுகள் நிறைவடைந்துள்ள நிலையில், உயிரிழந்த உறவுகளின் ஆத்ம சாந்திக்காக அக்கிராம மக்களும் உறவினர்களும் ஒன்றிணைந்து இவ்வாறான நினைவேந்தல் வழிபாடுகளை முன்னெடுத்தமை குறிப்பிடத்தக்கது.

, , ,

August 13, 2026

 

நூருல் ஹுதா உமர்

காரைதீவு பிரதேச வைத்தியசாலையின் அபிவிருத்தி தொடர்பான விசேட கூட்டமொன்று, கல்முனை பிராந்திய சுகாதார சேவைகள் பணிப்பாளர் வைத்திய கலாநிதி திருமதி சகீலா இஸ்ஸதீன் அவர்களின் தலைமையில் அவ்வைத்தியசாலையில் இடம்பெற்றது.

இக்கூட்டத்தில் பிராந்திய கண்காணிப்பு மற்றும் மதிப்பீட்டு பிரிவின் பொறுப்பு வைத்திய அதிகாரி டாக்டர் எம்.சீ.எம்.மாஹிர், காரைதீவு வைத்தியசாலையின் பொறுப்பு வைத்திய அதிகாரி டாக்டர் அஜந்தா உள்ளிட்ட வைத்தியசாலை அபிவிருத்திக் குழு உறுப்பினர்கள் பலரும் கலந்து கொண்டனர்.

இதன்போது, வைத்தியசாலையின் நடப்புச் செயற்பாடுகள் மற்றும் எதிர்கால அபிவிருத்தித் திட்டங்கள் குறித்து விரிவாகக் கலந்துரையாடப்பட்டது. அதனைத் தொடர்ந்து, வைத்தியசாலை உத்தியோகத்தர்கள், ஊழியர்களையும் மற்றும் வைத்தியசாலை அபிவிருத்திக் குழு உறுப்பினர்ககளையும் சந்தித்து கலந்துரையாடிய பிராந்திய பணிப்பாளர், வைத்தியசாலையின் தற்போதைய அத்தியாவசிய தேவைகள் குறித்தும் கேட்டறிந்து கொண்டார்.

 வைத்தியசாலைப் பொறுப்பதிகாரி மற்றும் அபிவிருத்திக் குழுவினரால் முன்வைக்கப்பட்ட பல்வேறு பிரச்சினைகளுக்கு இதன்போது உரிய தீர்வுகள் வழங்கப்பட்டமை குறிப்பிடத்தக்கது. 
, , ,

August 13, 2026

 


நூருல் ஹுதா உமர்


மாளிகைக்காடு மக்களுக்கான நிரந்தரமான மாற்று மையவாடியை பெற்றுக்கொடுப்பதற்கான நடவடிக்கைகளை காரைதீவு பிரதேச சபை உடனடியாக ஆரம்பிக்க வேண்டும் என காரைதீவு பிரதேச சபையின் உப தவிசாளர் எம்.எச்.எம். இஸ்மாயில் வலியுறுத்தியுள்ளார்.

காரைதீவு பிரதேச சபையின் மாதாந்த அமர்வில் உரையாற்றிய அவர், மாளிகைக்காடு பள்ளிவாசல்கள் மற்றும் பொது அமைப்புகளின் சம்மேளனத்துடன் கடந்த சில தினங்களாக தொடர்ச்சியான கலந்துரையாடல்கள் நடத்தப்பட்டு வருவதாக தெரிவித்தார்.

அந்தக் கலந்துரையாடல்களின் அடிப்படையில், காரைதீவு பிரதேச சபை எல்லைக்குட்பட்ட மாளிகைக்காடு மேற்கு பகுதியில் மையவாடிக்காக பயன்படுத்தக்கூடிய காணியொன்று அடையாளம் காணப்பட்டுள்ளதாகவும், குறித்த காணியை மையவாடிக்காக பெற்றுக்கொள்வதற்கான சட்டரீதியான மற்றும் நிர்வாக நடவடிக்கைகளை பிரதேச சபை முன்னெடுக்க வேண்டும் என்றும் அவர் குறிப்பிட்டார்.

கடந்த மாவட்ட ஒருங்கிணைப்புக் குழுக் கூட்டத்தில் இது தொடர்பாக கருத்து தெரிவித்த பிரதேச சபை தவிசாளர், குறித்த காணி அரசாங்கத்தின் கீழுள்ள விவசாய காணியாக இருப்பதாக சம்பந்தப்பட்ட அதிகாரிகள் தெரிவித்துள்ளதாகவும், பொதுத் தேவைக்காக அதனைப் பெற்றுக்கொள்வதற்கு உரிய நடைமுறைகளைப் பின்பற்ற முடியும் எனவும் குறிப்பிட்டிருந்ததாக உப தவிசாளர் தெரிவித்தார்.

மேலும், குறித்த விடயம் தொடர்பில் சாதகமான சமிக்ஞை கிடைத்துள்ளதாகவும் தவிசாளர் தெரிவித்திருந்த நிலையில், அந்த வாய்ப்பை பயன்படுத்தி மாளிகைக்காடு மக்களுக்கான நிரந்தரத் தீர்வை பெற்றுக்கொடுக்க வேண்டும் எனவும் அவர் வலியுறுத்தினார்.

“மாளிகைக்காடு மக்களுக்கு மையவாடி என்பது சாதாரண தேவையல்ல. அது ஒரு அடிப்படை மனிதாபிமானத் தேவையாகும். ஒரு சமூகத்தின் இறந்தவர்களை கண்ணியத்துடனும் அவர்களின் மத உரிமைகளுடனும் நல்லடக்கம் செய்வதற்கான நிரந்தர இடம் அவசியமாகும்” என அவர் தெரிவித்தார்.

மாளிகைக்காடு மக்கள் அடையாளம் காட்டியுள்ள காணியை அடிப்படையாகக் கொண்டு பிரதேச சபை உடனடியாக நடவடிக்கை எடுக்க வேண்டும் என்றும், பிரதேச சபையின் தலைமையில் மாளிகைக்காடு பள்ளிவாசல்கள் மற்றும் பொது அமைப்புகளின் பிரதிநிதிகள், பிரதேச செயலக அதிகாரிகள் மற்றும் சம்பந்தப்பட்ட அரச நிறுவனங்களின் அதிகாரிகளை அழைத்து விசேட கலந்துரையாடலொன்றை நடத்த வேண்டும் என்றும் அவர் கோரிக்கை விடுத்தார்.

அத்துடன், காணியைப் பெற்றுக்கொள்வதற்கான நடைமுறைகள், அதற்கு தேவைப்படும் காலம் மற்றும் பெற வேண்டிய அனுமதிகள் குறித்து மக்களுக்கு தெளிவுபடுத்த வேண்டிய பொறுப்பு பிரதேச சபைக்கு இருப்பதாகவும் அவர் சுட்டிக்காட்டினார்.

“காணியை அரசாங்க ரீதியாகப் பெற்றுக்கொள்வது நீண்டகால நடைமுறையாக இருக்கலாம். ஆனால் நடைமுறை சிக்கலானது என்பதற்காக முயற்சியை கைவிட முடியாது. மாளிகைக்காடு மக்களுக்கு தீர்வு வேண்டும். அந்தத் தீர்வை பெற்றுக்கொடுப்பதற்கான நடைமுறையை காரைதீவு பிரதேச சபை உடனடியாக ஆரம்பிக்க வேண்டும்” என உப தவிசாளர் எம்.எச்.எம். இஸ்மாயில் தெரிவித்தார்.

இதேவேளை, கல்முனை வடக்கு ஆதார வைத்தியசாலையில் புதிதாக சுகாதார உதவியாளர்களாக நியமிக்கப்பட்ட முஸ்லிம் பெண் உத்தியோகத்தர்கள் கடமையைப் பொறுப்பேற்கச் சென்றபோது, அவர்களின் மத மற்றும் கலாச்சார உடை தொடர்பில் ஆட்சேபனை தெரிவிக்கப்பட்டு தடைகள் ஏற்படுத்தப்பட்டதாக தெரிவிக்கப்படும் சம்பவத்திற்கும் அவர் கடும் கண்டனம் தெரிவித்தார்.

அரச சேவையில் பணியாற்றும் ஒவ்வொருவருக்கும் தமது மத மற்றும் கலாச்சார அடையாளங்களைப் பேணுவதற்கான உரிமை இருப்பதாகவும், அதேவேளை அரச நிறுவனங்களின் சீருடை மற்றும் ஒழுங்குமுறைகளும் மதிக்கப்பட வேண்டிய நிலையில், இரண்டுக்கும் இடையில் சட்டரீதியான சமநிலையை ஏற்படுத்துவது அவசியம் என்றும் அவர் குறிப்பிட்டார்.

பொது நிர்வாக அமைச்சினால் வெளியிடப்பட்ட சுற்றறிக்கைகள் மற்றும் அரச சேவை ஆடை தொடர்பான விதிமுறைகளை அதிகாரிகள் உரிய முறையில் கவனத்தில் கொள்ள வேண்டும் எனவும் அவர் வலியுறுத்தினார்.

இந்த விவகாரத்தை ஒரு தனிநபரின் விருப்பு அல்லது வெறுப்பு என்ற அடிப்படையில் அணுக முடியாது என தெரிவித்த அவர், இது அரச சேவையில் சமத்துவம், மத சுதந்திரம், நிர்வாக நியாயம் மற்றும் சமூக நல்லிணக்கத்துடன் தொடர்புடைய முக்கியமான பிரச்சினை எனவும் குறிப்பிட்டார்.

“கடந்த காலங்களில் இனவாதமும் மதவாதமும் பல்வேறு பிரச்சினைகளை உருவாக்கியுள்ளன. அந்தக் கசப்பான அனுபவங்களில் இருந்து நாம் பாடம் கற்றுக்கொள்ள வேண்டும். இனங்களுக்கும் மதங்களுக்கும் இடையில் நல்லிணக்கத்தை கட்டியெழுப்ப வேண்டிய காலகட்டத்தில் அரச நிறுவனங்களுக்குள் இருந்து இன அல்லது மத அடையாளங்களை கேள்விக்குள்ளாக்கும் நடவடிக்கைகள் இடம்பெறுவது ஆபத்தானது” என அவர் தெரிவித்தார்.

அரசாங்கம் இனவாதத்திற்கும் மதவாதத்திற்கும் எதிரான நிலைப்பாட்டை வெளிப்படுத்தி வரும் நிலையில், அதற்கு முரணான வகையில் செயற்படும் அதிகாரிகள் தொடர்பில் அரசாங்கம் தீவிர கவனம் செலுத்த வேண்டும் என்றும் அவர் கோரிக்கை விடுத்தார்.

குறித்த சம்பவம் தொடர்பில், அதிகாரிகள் தமது அதிகாரத்தைப் பயன்படுத்தி ஒரு சமூகத்தின் மத அல்லது கலாச்சார உரிமையை கட்டுப்படுத்த முயன்றார்களா, அரச சுற்றறிக்கைகள் மற்றும் நிர்வாக விதிமுறைகள் மீறப்பட்டனவா, புதிதாக நியமிக்கப்பட்ட உத்தியோகத்தர்களை கடமையைப் பொறுப்பேற்கவிடாமல் தடுப்பதற்கு சட்டரீதியான அதிகாரம் இருந்ததா என்பன தொடர்பில் உரிய விசாரணை நடத்தப்பட வேண்டும் எனவும் அவர் வலியுறுத்தினார்.

“இது எந்த ஒரு சமூகத்தையும் எதிர்த்து முன்வைக்கப்படும் கோரிக்கை அல்ல. இது சட்டத்தின் ஆட்சியை பாதுகாப்பதற்கான கோரிக்கை. அரச சேவையில் சமத்துவத்தை உறுதி செய்வதற்கான கோரிக்கை. மத சுதந்திரத்தை பாதுகாப்பதற்கான கோரிக்கை. எமது பிரதேசத்தின் இன நல்லிணக்கத்தை பாதுகாப்பதற்கான கோரிக்கை” என உப தவிசாளர் எம்.எச்.எம். இஸ்மாயில் தெரிவித்தார்.

கல்முனை வடக்கு ஆதார வைத்தியசாலை சம்பவம் தொடர்பில் உடனடியாக விசாரணை நடத்தப்பட்டு உண்மை நிலை வெளிப்படுத்தப்பட வேண்டும் என்றும், தவறு செய்த அதிகாரிகள் இருப்பின் அவர்களுக்கு எதிராக உரிய ஒழுக்காற்று நடவடிக்கை எடுக்கப்பட வேண்டும் என்றும் அவர் கோரிக்கை விடுத்தார்.

“மாளிகைக்காடு மையவாடி பிரச்சினைக்கும், கல்முனை வடக்கு ஆதார வைத்தியசாலை பிரச்சினைக்கும் அடிப்படையில் தேவைப்படுவது மக்களின் உரிமைகளையும் கண்ணியத்தையும் மதிக்கும் நிர்வாகமே. இனவாதத்திற்கும் மதவாதத்திற்கும் இடமில்லாத, அனைத்து சமூகங்களும் சம உரிமையுடனும் கண்ணியத்துடனும் வாழக்கூடிய சமூகத்தை கட்டியெழுப்புவதே எமது இலக்காக இருக்க வேண்டும்” என அவர் மேலும் தெரிவித்தார்.

, , ,

August 10, 2026

 


#கல்முனை #வடக்கு #ஆதார #வைத்தியசாலையில் #பர்தா #அணிந்து #கடமையேற்கத் #தடையா? : பேச்சுவார்த்தை மூலம் தீர்வு காணப்படும் என வைத்தியசாலை அத்தியட்சகர் உறுதி

நூருல் ஹுதா உமர்
கல்முனை வடக்கு ஆதார வைத்தியசாலையில் பர்தா அணிந்து கடமையேற்கச் சென்ற புதிய நியமனம் பெற்ற முஸ்லிம் பெண் உத்தியோகத்தர்ககளை கடமைக்கு அறிக்கை செய்ய விடாது தடுத்ததாகக் கூறப்படும் சம்பவம் இன்று (10) இடம்பெற்றுள்ளதாக தெரிவிக்கப்படுகிறது.
புதிய நியமனம் பெற்ற குறித்த பெண் உத்தியோகத்தர்களும் தங்களது கலாசார மற்றும் மத நடைமுறைக்கு அமைவாக பர்தா அணிந்த நிலையில், கல்முனை வடக்கு ஆதார வைத்தியசாலைக்கு கடமையேற்கச் சென்றுள்ளனர். எனினும், அவர்கள் கடமைக்கு அறிக்கை செய்வதற்கு அனுமதிக்கப்படவில்லை என குற்றம் சாட்டப்பட்டுள்ளது.
முஸ்லிம் பெண் உத்தியோகத்தர்கள் தங்களது கலாசார முறைக்கேற்ப உடை அணிந்து கடமையாற்றுவதற்கு சுகாதார அமைச்சினால் அனுமதி வழங்கப்பட்டுள்ளதாகவும், அவ்வாறிருக்கையில் தங்களை கடமையேற்க விடாது தடுத்தமை தொடர்பில் உரிய விளக்கம் வழங்கப்பட வேண்டும் எனவும் பாதிக்கப்பட்டதாகக் கூறப்படும் உத்தியோகத்தர்கள் தெரிவித்துள்ளனர்.
இந்நிலையில், இந்த விடயம் தொடர்பாக எமது ஊடகவியலாளர் நூருல் ஹுதா உமர், கல்முனை வடக்கு ஆதார வைத்தியசாலை அத்தியட்சகர் குணசிங்கம் சுகுணனை தொடர்புகொண்டு வினவியபோது, “இனவாதமாகவோ, பிரதேசவாதமாகவோ, தான் விரும்பியவாறோ யாரும் செயற்பட முடியாது. இது அரச ஸ்தாபனம். இந்த இடத்தில் யாருடைய விருப்பத்தின் படியும் யாரும் நடக்க முடியாது. அரசியலமைப்பு, தாபன விதிக்கோவை மற்றும் உரிய சுற்றுநிருபங்கள் என்ன கூறுகின்றனவோ அதற்கமையவே செயற்பட முடியும்” எனத் தெரிவித்தார்.
மேலும், தற்போது ஏற்பட்டுள்ள பிரச்சினையை சுமூகமான பேச்சுவார்த்தை மூலம் தீர்த்துக்கொள்ள நடவடிக்கை எடுக்கப்படும் என்றும் வைத்தியசாலை அத்தியட்சகர் உறுதியளித்ததாக தெரிவிக்கப்படுகிறது.
இச்சம்பவம் தொடர்பில் சமூக ஊடகங்களிலும் பொதுமக்கள் மத்தியிலும் பல்வேறு கருத்துக்கள் வெளியாகி வரும் நிலையில், சம்பவத்தின் உண்மை நிலை, நடைமுறையில் உள்ள சுகாதார அமைச்சின் சுற்றுநிருபங்கள் மற்றும் அரச சேவை விதிமுறைகளுக்கு அமைவாக உரிய முறையில் தீர்வு காணப்பட வேண்டும் என சமூக ஆர்வலர்கள் வலியுறுத்துகின்றனர்.
பர்தா அணிந்து கடமையாற்றுவதற்கான அனுமதி தொடர்பான சுகாதார அமைச்சின் நடைமுறைகள் மற்றும் சம்பந்தப்பட்ட சுற்றுநிருபங்கள் தெளிவுபடுத்தப்படுவது, எதிர்காலத்தில் இவ்வாறான சர்ச்சைகள் ஏற்படுவதைத் தவிர்க்க உதவும் எனவும் தெரிவிக்கப்படுகிறது.
, , ,

August 09, 2026

 


வலிகாமம் வடக்கு, பலாலி பகுதியில் தமது பூர்வீக காணிகளில் மீள்குடியேற அனுமதிக்கக் கோரி காணி உரிமையாளர்கள் இன்று (09) 8ஆவது வாரமாகவும் தொடர் அமைதிவழிப் போராட்டத்தை முன்னெடுத்துள்ளனர்.


பலாலி சந்தியில் நடைபெற்ற இந்தப் போராட்டத்தில், நீண்டகாலமாக தமது காணிகள் அரச படைகளின் கட்டுப்பாட்டில் இருப்பதால் சொந்த நிலங்களுக்குத் திரும்ப முடியாத நிலை தொடர்வதாக மக்கள் தெரிவித்தனர்.


“எங்கள் காணிகள் எங்களுக்கே வேண்டும்”, “பூர்வீக நிலங்களில் மீள்குடியேற அனுமதிக்க வேண்டும்”, “மக்களின் நிலங்களை சுரண்டுவதை நிறுத்த வேண்டும்” உள்ளிட்ட கோஷங்களை எழுப்பியவாறு மக்கள் போராட்டத்தில் ஈடுபட்டனர்.


பல ஆண்டுகளாக சொந்த நிலங்களில் குடியேற முடியாத காரணத்தால் தமது குடியிருப்பு, வாழ்வாதாரம் மற்றும் எதிர்கால வாழ்க்கை பாதிக்கப்பட்டுள்ளதாகவும் அவர்கள் சுட்டிக்காட்டினர்.


தமது காணிகளை விடுவிப்பதாக அரசாங்கத்தினால் பல்வேறு சந்தர்ப்பங்களில் உறுதிமொழிகள் வழங்கப்பட்ட போதிலும், அவை முழுமையாக நடைமுறைப்படுத்தப்படவில்லை என போராட்டத்தில் ஈடுபட்ட மக்கள் குற்றஞ்சாட்டினர்.


இதன் காரணமாகவே தமது காணிகளை மீட்பதற்காக தொடர்ச்சியான போராட்டத்தை முன்னெடுக்க வேண்டிய நிலை ஏற்பட்டுள்ளதாகவும் அவர்கள் தெரிவித்தனர்.


தமது பூர்வீக நிலங்களில் மீள்குடியேறி இயல்பான வாழ்க்கையை முன்னெடுப்பதே தங்களது பிரதான கோரிக்கை என தெரிவித்த மக்கள், எந்தவித வன்முறையுமின்றி அமைதியான முறையில் போராட்டத்தை தொடர்ந்து முன்னெடுத்து வருவதாகவும் குறிப்பிட்டனர்.


பலாலி மக்களின் பூர்வீக காணிகளை உரிய உரிமையாளர்களிடம் மீளக் கையளித்து, அவர்களின் மீள்குடியேற்றத்தை உறுதிப்படுத்த அரசாங்கம் உடனடியாக நடவடிக்கை எடுக்க வேண்டும் எனவும் அவர்கள் வலியுறுத்தினர்.


“நிலம் எங்களின் உரிமை; எங்கள் பூர்வீக நிலங்களை விட்டுக்கொடுக்க மாட்டோம்” என்ற கோரிக்கையுடன், 8ஆவது வாரமாகவும் பலாலி சந்தியில் மக்கள் தமது போராட்டத்தை தொடர்ந்தனர்.

, ,

August 09, 2026

 


இலங்கை முழுவதும் தரம் 5 மாணவர்களுக்கான புலமைப்பரிசில் பரீட்சை இன்று (09) காலை நாடு தழுவிய ரீதியில் அமைதியாகவும், சுமுகமான முறையிலும் ஆரம்பமாகி நடைபெற்று வருகின்றது.


அமைக்கப்பட்ட  2,723 பரீட்சை நிலையங்களில்   மாணவர்கள் மிகவும் உற்சாகத்துடனும் ஆர்வத்துடனும் பரீட்சைக்குத் தோற்றி வருகின்றனர். வினாத்தாள்களைப் பெற்றுக்கொண்ட மாணவர்கள் எவ்வித பதற்றமுமின்றி நம்பிக்கையுடன் பரீட்சை எழுதுவதை அவதானிக்க முடிந்தது.

பரீட்சை நடவடிக்கைகளை எவ்வித இடையூறுகளுமின்றி மிகவும் நேர்த்தியாக நடத்துவதற்காக, நாட்டின் அனைத்துப் பரீட்சை நிலையங்களுக்கும் பலத்த பொலிஸ் பாதுகாப்பு வழங்கப்பட்டுள்ளது. பரீட்சார்த்திகளின் போக்குவரத்துச் சௌகரியங்கள் மற்றும் நிலையங்களின் பாதுகாப்பைப் பலப்படுத்தும் வகையில் பொலிஸார் தீவிரக் கடமையில் ஈடுபட்டுள்ளனர்.

இதற்கமைய தரம் 5 புலமைப்பரிசில் பரீட்சை  அம்பாறை மாவட்டத்தில் கடும் வெயிலுக்கு  மத்தியில் இடம்பெற்று வருகின்றது.பரீட்சை காலை 09.30 மணிக்கு ஆரம்பமானதுடன்  பரீட்சார்த்திகள் அனைவரும்  உரிய ஒழுங்கமைப்புடன்  பரீட்சை மண்டபத்திற்கு சென்றதை காண முடிந்தது.


இன்று காலை ஆரம்பமான குறித்த பரீட்சைக்கு கல்முனை கல்வி வலயம்  சம்மாந்துறை கல்வி வலயத்தை சேர்ந்த மாணவர்கள் மிக ஆர்வத்துடன் பரீட்சைக்கு சமூகமளித்திருந்தனர்.

மேலும் பரீட்சை இடம்பெற்ற நிலையங்களில்   பொலிஸாரின் பாதுகாப்பு பலப்படுத்தப்பட்டுள்ளது பரீட்சையை எவ்வித பிரச்சினைகளும் இன்றி நடைபெறுவதற்கு பெற்றேர்கள் உள்ளிட்ட தரப்பினர்கள் பூரண ஒத்துழைப்புக்களை வழங்கி வருவதாக எமது பிராந்திய செய்தியாளர் பாறுக் ஷிஹான் தெரிவித்தார்.

அத்துடன், பரீட்சை திணைக்கள அதிகாரிகள் மற்றும் கல்வி அதிகாரிகளின் நேரடி மேற்பார்வையில், மாணவர்களுக்குத் தேவையான அனைத்து அடிப்படை வசதிகளும் தங்குதடையின்றி ஏற்பாடு செய்யப்பட்டுள்ளதாகப் பரீட்சைகள் திணைக்களம் தெரிவித்துள்ளமை குறிப்பிடத்தக்கது.

பிள்ளைகளின் மன ஏகாகிரதையைப் பேணி, கவனத்துடன் பரீட்சைக்கு முகங்கொடுப்பதற்கு இலகுவாக இருக்கும் வகையில், பரீட்சை ஆரம்பமாவதற்கு ஒரு மணித்தியாலத்திற்கு முன்னதாக பரீட்சை நிலையங்களைச் சென்றடையுமாறு பரீட்சைகள் திணைக்களம் அறிவுறுத்துகிறது.

இதற்கமைய, காலை 9.30 மணிக்கு பரீட்சை ஆரம்பமாகவுள்ளதுடன், அனைத்து மாணவர்களும் காலை 09.00 மணிக்கு பரீட்சை மண்டபத்தில் அமர்ந்திருக்க வேண்டும் என பரீட்சைகள் ஆணையாளர் நாயகம் ஏ.கே.எஸ். இந்திகா குமாரி தெரிவித்தார்.

முதலாவதாக இரண்டாம் வினாத்தாள் வழங்கப்படும் என்பதுடன், அது காலை 9.30 மணிக்கு ஆரம்பமாகி காலை 10.45 மணிக்கு நிறைவடையவுள்ளது.

பின்னர் வழங்கப்படும் சிறு இடைவேளையின் பின்னர், காலை 11.15 முதல் நண்பகல் 12.15 வரை ஒரு மணித்தியால காலம் முதல் வினாத்தாளுக்காக வழங்கப்படும்.

பரீட்சைக்குத் தோற்றும் அனைத்துப் பிள்ளைகளும் வினாத்தாளில் உள்ள அறிவுறுத்தல்களை நன்றாக வாசித்து, தங்களது பரீட்சை இலக்கத்தை சரியாகக் குறிப்பிட்டு, தெளிவான கையெழுத்தில் வினாத்தாளிலேயே விடையளிக்க வேண்டும் என்றும் பரீட்சைகள் ஆணையாளர் நாயகம் குறிப்பிட்டுள்ளார்.

மேலும், கைபேசிகள், ஸ்மார்ட் கைக்கடிகாரங்கள், குறிப்புகள் அல்லது ஏனைய இலத்திரனியல் சாதனங்கள் எதனையும் பரீட்சை மண்டபத்திற்குள் கொண்டு செல்வதைத் தவிர்க்குமாறும் பரீட்சைகள் ஆணையாளர் நாயகம் மேலும் தெரிவித்துள்ளார்.


, , ,

August 03, 2026



பாறுக் ஷிஹான்

வடிகான் அமைப்புகள் அடைபட்டதால் வீதிகள் நீரில் மூழ்கின; பொதுமக்கள் அசௌகரியம்!


சாய்ந்தமருது மற்றும் அதன் அதனைச் சுற்றியுள்ள உள்ளூர் பகுதிகளில் தொடர்ச்சியாகப் பெய்து வரும் அடைமழை காரணமாக, பல பிரதான மற்றும் உட்புற வீதிகளில் வெள்ளநீர் தேங்கியுள்ளது.

ஞாயிற்றுக்கிழமை (2) மாலை மழைநீரானது வடிகான்கள் வழியே முறையாக வழிந்தோட வழியின்மையினாலேயே பெரும்பாலான வீதிகள் நீரில் மூழ்கியுள்ளதாகப் பிரதேசவாசிகள் தெரிவிக்கின்றனர்.

இதனால் பாதசாரிகள், பாடசாலை மாணவர்கள் மற்றும் வாகனச் சாரதிகள் பாரிய அசௌகரியங்களை எதிர்நோக்கி வருவதோடு, அன்றாடக் காரியங்களை மேற்கொள்வதிலும் பெரும் சிரமங்கள் ஏற்பட்டுள்ளன.

முறைசாரா வடிகான் அமைப்புகள் மற்றும் அடைபட்டுள்ள நீர்வரத்து வழிகளை உடனடியாகச் சீரமைத்து, தேங்கியுள்ள வெள்ளநீரை அகற்றுவதற்குப் பிரதேச சபையும் உரிய அதிகாரிகளும் விரைந்து நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.

, , ,

August 03, 2026


 பாறுக் ஷிஹான்


பிரதேச சபை தவிசாளர் சட்டத்தரணி ஏ.எல். றியாஸ் ஆதம் பிரதம அதிதியாகப் பங்கேற்பு; அம்பாறை மாவட்ட நடுவர் சங்கத் தலைவர் கௌரவிப்பு!


நிந்தவூர் நடுவர்கள் கல்வி மேம்பாட்டு அமைப்பின் (Society of Nintavur Umpiring Education) ஏற்பாட்டில், நிந்தவூர் பிரதேசத்தைச் சேர்ந்த கிரிக்கெட் நடுவர்களைக் கௌரவிக்கும் “Extolling & Honouring Umpiring – 2026” சான்றிதழ் மற்றும் நினைவுச் சின்னங்கள் வழங்கும் விழா ஞாயிற்றுக்கிழமை (02) நிந்தவூர் அல்-மஸ்ஹர் பெண்கள் உயர்தரப் பாடசாலை கேட்போர் கூடத்தில் சிறப்பாக நடைபெற்றது.

அமைப்பின் தலைவர் ஐ.எல்.எம். இப்றாஹிம் தலைமையில் நடைபெற்ற இந்நிகழ்வில், நிந்தவூர் பிரதேச சபையின் தவிசாளரும் சட்டத்தரணியுமான ஏ.எல். றியாஸ் ஆதம் பிரதம அதிதியாகக் கலந்துகொண்டு நிகழ்வைச் சிறப்பித்தார்.

கிரிக்கெட் விளையாட்டில் நேர்மை, ஒழுக்கம் மற்றும் அர்ப்பணிப்புடன் சேவையாற்றி வரும் நடுவர்களின் பங்களிப்பைப் பாராட்டும் வகையிலும், விளையாட்டின் தரத்தையும் நம்பகத்தன்மையையும் பேணி வரும் நீண்டகால அனுபவம் வாய்ந்த நடுவர்களைக் கௌரவிக்கும் வகையிலும் இவ்விழா ஒழுங்கமைக்கப்பட்டிருந்தது.

நடுவர்களின் சேவை வெற்றிகரமான போட்டிக்கு அடித்தளம் - பிரதேச சபை தவிசாளர்
நிகழ்வில் உரையாற்றிய பிரதேச சபை தவிசாளர் சட்டத்தரணி ஏ.எல். றியாஸ் ஆதம்


"விளையாட்டுத் துறையில் நடுவர்களின் நேர்மையான சேவை என்பது ஒரு போட்டியை வெற்றிகரமாக நடத்துவதற்கான முக்கிய அடித்தளமாகும். களத்தில் அர்ப்பணிப்புடன் செயலாற்றும் நடுவர்களைச் சமூகமாக மதித்து கௌரவிப்பது காலத்தின் தேவையாகும்" எனக் குறிப்பிட்டார்.

 இவ்விழாவில் அம்பாறை மாவட்ட கிரிக்கெட் நடுவர் சங்கத்தின் தலைவர் ஆசிரியர் எஸ்.எம். ஆரிப்   கௌரவிக்கப்பட்டார்.

மேலும், நிந்தவூர் பிராந்திய விளையாட்டுக் கழகங்களின் நிர்வாகிகள், அணித்தலைவர்கள், முன்னாள் மற்றும் தற்போதைய கிரிக்கெட் வீரர்கள், விளையாட்டுத் துறைப் பிரமுகர்கள் மற்றும் சமூக ஆர்வலர்கள் எனப் பெருந்திரளானோர் கலந்துகொண்டு சிறப்பித்தனர்.

, ,

July 28, 2026


 நூருல் ஹுதா உமர்


மோசடிகளைத் தடுக்கும் சட்டக் கட்டளைச் சட்டம் (Prevention of Fraud Ordinance) மற்றும் நொத்தாரிசுகள் சட்டக் கட்டளைச் சட்டத்தின் (Notaries Ordinance) கீழ், நிலம் தொடர்பான எந்தவொரு உறுதியும், தகுதியும் உரிமமும் பெற்ற பிரசித்தி பெற்ற நொத்தாரிசு அல்லது நொத்தாரிசு உரிமம் கொண்ட சட்டத்தரணிகள் முன்னிலையிலேயே நிறைவேற்றப்பட வேண்டும். மாறாக, ஒரு நொத்தாரிசின் கிளாக் அல்லது சட்டவிரோத முகவர்கள் முன்போ உறுதிகளை நிறைவேற்றினால், அவை சட்டப்படி போலி உறுதிகளாகவே கருதப்படும் என சாய்ந்தமருது நொத்தாரிசுகள் கூட்டாக எச்சரிக்கை விடுத்துள்ளனர்.

அவர்கள் கூட்டாக வெளியிட்டுள்ள அறிக்கையில், சாய்ந்தமருது பகுதியில் பலர் தமக்கு நொத்தாரிசு உரிமம் இல்லாதிருந்தும், தம்மை நொத்தாரிசு எனக் பொய்கூறி நம்ப வைத்தோ அல்லது நொத்தாரிசு கிளாக் என அடையாளப்படுத்தியோ சட்டவிரோதமாக உறுதிகளை நிறைவேற்றி வருகின்றனர். இவ்வாறான ஏமாற்றுப் பேர்வழிகள் பணத்தை உறிஞ்சும் நோக்கில் செய்யும் நடவடிக்கைகளால், பொதுமக்கள் தங்களின் சிறுகச் சிறுகச் சேர்த்த பெருந்தொகை பணத்தை வழங்கி வாங்கிய நிலங்களை சட்டப்படி இழக்கும் அபாயம் ஏற்பட்டுள்ளது. இத்தகைய சட்டவிரோத செயற்பாடுகளில் சில அரசு ஊழியர்களும் ஈடுபட்டு வருவது அவதானிக்கப்பட்டுள்ளதாக அவர்கள் சுட்டிக்காட்டியுள்ளனர்.

நொத்தாரிசு பெயர் பலகை இல்லாத இடங்களில் உறுதிகளை எழுதுவது முற்றிலும் முறையற்றதும் சட்டவிரோதமானதும் ஆகும். உறுதி நிறைவேற்றப்படும் முன்னர், சம்பந்தப்பட்ட நபர் பிரசித்தி பெற்ற நொத்தாரிசாக அல்லது உரிமம் பெற்ற சட்டத்தரணியாக உள்ளாரா என்பதை பொதுமக்கள் உறுதிப்படுத்திக் கொள்ள வேண்டும். இடைத்தரகர்கள் அல்லது எழுத்தர்களிடம் நேரடியாகப் பணத்தைக் கொடுத்து சான்றிதழ் அற்ற உறுதிகளைப் பெறுவதைத் தவிர்க்க வேண்டும். பொதுமக்கள் தங்களின் வாழ்நாள் சொத்துக்களைப் பாதுகாத்துக் கொள்ள விழிப்புணர்வுடன் செயல்படுமாறு சாயந்தமருது பிரதேசப் பிரசித்தி பெற்ற நொத்தாரிசுகள் தங்களது கூட்டு அறிக்கையில் வலியுறுத்தியுள்ளனர்.

, , ,

July 19, 2026



நூருல் ஹுதா உமர்


சம்மாந்துறை பொலிஸ் பிரிவுக்குட்பட்ட பகுதிகளில் அதிகரித்து வரும் மோட்டார் சைக்கிள் திருட்டுகள், போக்குவரத்து விதிமீறல்கள் மற்றும் விபத்துக்களைக் கட்டுப்படுத்தும் நோக்கில், மோட்டார் சைக்கிள்களுக்கான புதிய விசேட பாதுகாப்பு ஸ்டிக்கர் வழங்கும் திட்டம் அறிமுகப்படுத்தப்பட்டுள்ளதாக சம்மாந்துறை பொலிஸார் தெரிவித்துள்ளனர்.

இத்திட்டத்தின் கீழ், ஒவ்வொரு மோட்டார் சைக்கிளுக்கும் பிரத்யேக அடையாள இலக்கத்துடன் கூடிய பாதுகாப்பு ஸ்டிக்கர் வழங்கப்படவுள்ளது. அந்த ஸ்டிக்கருடன் தொடர்புடைய வாகன உரிமையாளரின் பெயர், தொலைபேசி இலக்கம், வாகன மற்றும் எஞ்சின் விபரங்கள் உள்ளிட்ட தகவல்கள் அனைத்தும் பொலிஸ் தரவுத்தளத்தில் பதிவு செய்யப்படுகின்றன.

எதிர்காலத்தில் ஏதேனும் குற்றச்செயல், திருட்டு அல்லது விபத்து சம்பவங்கள் இடம்பெற்றால், சிசிடிவி (CCTV) கண்காணிப்பு கமெராக்கள் மூலம் ஸ்டிக்கர் இலக்கத்தை அடையாளம் கண்டு, இலங்கையின் எந்தவொரு பொலிஸ் நிலையத்திலிருந்தும் குறித்த வாகனத்தின் விபரங்களை விரைவாகக் கண்டறிந்து தேவையான நடவடிக்கைகளை மேற்கொள்ள முடியும் என பொலிஸார் தெரிவித்துள்ளனர்.

பொதுமக்களின் பாதுகாப்பை உறுதிப்படுத்துவதோடு, சமூகத்தில் இடம்பெறும் குற்றச்செயல்களைக் குறைப்பதையும் நோக்கமாகக் கொண்டு, அம்பாறை மற்றும் கல்முனை பொலிஸ் அதிகாரிகளின் வழிகாட்டலின் கீழ் இத்திட்டம் நடைமுறைப்படுத்தப்பட்டு வருகிறது.

இதுவரை கணிசமான எண்ணிக்கையிலான மோட்டார் சைக்கிள்கள் பதிவு செய்யப்பட்டுள்ள நிலையில், இன்னும் பதிவு செய்யாத வாகன உரிமையாளர்கள் தங்களது மோட்டார் சைக்கிள்களை உடனடியாக பதிவு செய்து, இந்த பாதுகாப்புத் திட்டத்திற்கு முழுமையான ஒத்துழைப்பை வழங்குமாறு சம்மாந்துறை பொலிஸார் பொதுமக்களிடம் கேட்டுக்கொண்டுள்ளனர்.

கிழக்குப் பிரிவுக்குப் பொறுப்பான சிரேஷ்ட பிரதிப் பொலிஸ் மா அதிபர் மகேஷ் சேனாரத்னவின் பணிப்புரைக்கமையும், அம்பாறை மாவட்ட பிரதிப் பொலிஸ் மா அதிபர் சுஜித் வேதமுல்லவின் உத்தரவிற்கமையும், அம்பாறை மாவட்ட சிரேஷ்ட பொலிஸ் அத்தியட்சகர் பிரியந்த பண்டார கஸ்தூரி ஆராய்ச்சியின் வழிநடத்தலிலும், கல்முனை பிராந்திய உதவிப் பொலிஸ் அத்தியட்சகர் இப்னு அசாரின் நெறிப்படுத்தலிலும், சம்மாந்துறை பொலிஸ் நிலையப் பொறுப்பதிகாரி டபிள்யூ.ஏ.என். நிசாந்த பிரதீப் குமாரவின் தலைமையில், சம்மாந்துறை பொலிஸ் போக்குவரத்து பிரிவு பொறுப்பதிகாரி ஏ.டி.ஆர். விஜயவர்த்தன உள்ளிட்ட பொலிஸ் குழுவினர் இந்த விசேட பாதுகாப்பு நடவடிக்கைகளை முன்னெடுத்து வருகின்றனர்.


, ,

July 13, 2026


மாளிகைக்காடு செய்தியாளர்

சாய்ந்தமருது சுகாதார வைத்திய அதிகாரி காரியாலயத்தில் கர்ப்பிணி தாய்மார்களுக்காக நடைபெற்ற மாதாந்த தாய்சேய் நலக் கிளினிக்குடன் இணைந்த டெங்கு விழிப்புணர்வு நிகழ்ச்சி இன்று நடைபெற்றது. இந்நிகழ்வில் சாய்ந்தமருது சுகாதார வைத்திய அதிகாரி டாக்டர் ஜே. மாதன் கலந்துகொண்டு, கர்ப்பிணி தாய்மார்களுக்கு டெங்கு நோய் தொடர்பான விரிவான விழிப்புணர்வு உரையாற்றினார்.

இதன்போது, பயணம் மற்றும் சுற்றுலா மேற்கொள்ளும் சந்தர்ப்பங்களில் நுளம்புக் கடியிலிருந்து எவ்வாறு தங்களைப் பாதுகாத்துக்கொள்வது, டெங்கு நோய் பரவலைத் தடுப்பதற்காக வீட்டுச் சூழலை தூய்மையாகப் பராமரிப்பதன் அவசியம், நுளம்பு பெருகக்கூடிய இடங்களை அகற்றுதல் உள்ளிட்ட முன்னெச்சரிக்கை நடவடிக்கைகள் குறித்து விளக்கமளிக்கப்பட்டது.

மேலும், தொடர்ச்சியாக காய்ச்சல் ஏற்பட்டால் அதனை அலட்சியம் செய்யாமல் உடனடியாக அருகிலுள்ள வைத்தியசாலைக்குச் சென்று இரத்தப் பரிசோதனை மேற்கொள்ள வேண்டியதன் முக்கியத்துவத்தையும் அவர் வலியுறுத்தினார்.

கர்ப்பகாலத்தில் டெங்கு நோயால் ஏற்படக்கூடிய சிக்கல்கள், தாய் மற்றும் சேயின் நலனைப் பாதுகாப்பதற்காக கடைப்பிடிக்க வேண்டிய சுகாதார நடைமுறைகள், மருத்துவ ஆலோசனைகளை முறையாகப் பின்பற்றுவதன் அவசியம் என்பன குறித்தும் டாக்டர் ஜே. மாதன் தெளிவுபடுத்தினார்.

இந்நிகழ்வில் கலந்துகொண்ட கர்ப்பிணி தாய்மார்களுக்கு டெங்கு தடுப்பு தொடர்பான சுகாதார ஆலோசனைகளும் வழங்கப்பட்டதுடன், விழிப்புணர்வு துண்டுப்பிரசுரங்களும் விநியோகிக்கப்பட்டன.

, ,

July 13, 2026


 நூருல் ஹுதா உமர்


நிந்தவூர் எம்.எச்.எம். அஷ்ரப் சதுக்கம் மற்றும் நிந்தவூர் பிரதேச சபையைச் சுற்றியுள்ள பகுதிகளில் சட்டவிரோதமாக குப்பைகள் மற்றும் கழிவுப்பொருட்கள் கொட்டப்படுவதைத் தடுக்கும் நோக்கில் கடுமையான கண்காணிப்பு நடவடிக்கைகள் முன்னெடுக்கப்பட்டுள்ளதாக நிந்தவூர் பிரதேச சபை தெரிவித்துள்ளது.

குறித்த பகுதிகளில் குப்பைகள் கொட்ட வேண்டாம் என பலமுறை பொதுமக்களுக்கு அறிவுறுத்தப்பட்ட போதிலும், சிலர் தொடர்ச்சியாக அநாமதேயமாக குப்பைகள் மற்றும் கழிவுப்பொருட்களை கொட்டி வருவதாக பிரதேச சபை சுட்டிக்காட்டியுள்ளது.

இதன் காரணமாக சுற்றுச்சூழல் மாசுபடுவதுடன், பொதுச் சுகாதாரத்திற்கும் பாதிப்பு ஏற்படுவதோடு, பிரதேசத்தின் அழகும் பாதிக்கப்படுவதாக தெரிவிக்கப்பட்டுள்ளது.

இதனையடுத்து, எம்.எச்.எம். அஷ்ரப் சதுக்கம் மற்றும் பிரதேச சபை வளாகத்தைச் சுற்றியுள்ள பகுதிகளில் எந்தவிதமான குப்பைகளையும் அல்லது கழிவுப்பொருட்களையும் கொட்டுவது முற்றிலும் தடை செய்யப்பட்டுள்ளதாக பிரதேச சபை அறிவித்துள்ளது.

பொதுமக்கள் தங்களது வீட்டு மற்றும் சிறியளவிலான கழிவுப்பொருட்களை நிந்தவூர் பொதுச் சந்தை வளாகத்தில் அமைக்கப்பட்டுள்ள தினசரி கழிவகற்றல் பெட்டியில் மட்டுமே ஒழுங்காகவும் பொறுப்புடனும் அகற்றுமாறு கேட்டுக்கொள்ளப்பட்டுள்ளது.

மேலும், சட்டவிரோதமாக குப்பைகள் கொட்டுபவர்களை அடையாளம் காணும் நோக்கில் குறித்த பகுதிகளில் இரகசிய கண்காணிப்பு கமராக்கள் (CCTV) பொருத்தப்பட்டு தொடர்ச்சியான கண்காணிப்பு நடவடிக்கைகள் மேற்கொள்ளப்பட்டு வருவதாகவும், விதிமுறைகளை மீறி குப்பைகள் கொட்டுபவர்கள் அடையாளம் காணப்பட்டால் அவர்களுக்கு எதிராக நடைமுறையில் உள்ள சட்டங்களின் கீழ் கடுமையான சட்ட நடவடிக்கை எடுக்கப்படும் எனவும் நிந்தவூர் பிரதேச சபை எச்சரித்துள்ளது.

பொதுமக்கள் சுற்றுச்சூழலைப் பாதுகாக்கும் பொது பொறுப்புணர்வுடன் செயற்பட்டு, தூய்மையான நிந்தவூரை உருவாக்குவதற்கு ஒத்துழைப்பு வழங்குமாறும் பிரதேச சபை வேண்டுகோள் விடுத்துள்ளது.

, ,

July 12, 2026

 (எம். என்.எம்.அப்ராஸ்) 

 
கல்முனை பிரதேச செயலகத்துக்குட்பட்ட கிராம சேவகர் பிரிவுகளுக்கான பிரஜாசக்தி உறுப்பினர்களுக்கான நியமனக் கடிதம் வழங்கும் நிகழ்வு கல்முனை அல்-பஹ்ரியா மகா வித்தியாலயத்தில் (தேசிய பாடசாலை ) நேற்று (11) இடம் பெற்றது .

 இந்நிகழ்வில் பிரதம அதிதியாக பாராளுமன்ற உறுப்பினர் அபூபக்கர் ஆதம்பாவா அவர்களும்,கௌரவ அதிதியாக கல்முனை பிரதேச செயலாளர் ரீ.எம்.எம் அன்சார் மற்றும் விசேட அதிதியாக கல்முனை பொலிஸ் நிலைய பொறுப்பதிகாரி லசந்த களுவாராச்சி, கல்முனை பொலிஸ் பிரதம பரிசோதகர் அப்துல் வாஹிட் , பிரஜா சக்தி தவிசாளர்கள் மற்றும் அதன் அங்கத்தவர்கள் தேசிய மக்கள் கட்சியின் (NPP) செயற்பாட்டாளர்கள் என பலரும் கலந்து கொண்டனர்.

, , ,

July 12, 2026

 


வி.சுகிர்தகுமார்           

அம்பாரை மாவட்டம் பொத்துவில் அறுகம்பை உல்லை சுற்றுலாப்பிரதேசம் சுறுசுறுப்பாக காணப்பட்டதுடன் ஆயிரக்கணக்கான உல்லாச சுற்றுலாப்பயணிகளால் நிரம்பி வழிந்ததை காணமுடிகின்றது.
சுற்றுலாப் பயணிகள் கடற்கரை பிரதேசத்தில் பல்வேறு விளையாட்டுக்களில் ஈடுபட்டிருந்ததையும் அவதானிக்க முடிந்தது.
 உலகப்புகழ் பெற்றதும், இயற்கையானதும், கடல் விளையாட்டிற்கு பொருத்தமானதுமானதும் பாதுகாப்பானதுமான உல்லைப்பிரதேசம் அனைவரையும் கவர்ந்திழுக்கும் பிரதேசம் என்பதுடன் அனைத்து மக்களும் ஒன்று சேரக்கூடிய இடமாகவும் கருதப்படுகின்றது.
 வெளிநாட்டு உல்லாசப்பயணிகளின் வருகை அதிகரித்துள்ள இக்காலத்தில் உள்நாட்டு மக்களும் விடுமுறையை கழிப்பதற்காக நாட்டின் பல பிரதேசங்களிலிருந்து மக்களும் திரண்டிருந்த அதேவேளை சிறுவர்கள் முதல் பெரியவர்கள் வரை மகிழ்ச்சியுடன்  கடலில் நீராடியதுடன் விளையாட்டு நிகழ்வுகளில் ஈடுபட்டனர்.
சுற்றுலாப்பயணிகளின் வருகையால் ஹோட்டல்கள் யாவும் உல்லாசப்பயணிகளால் நிரம்பி வழிந்ததையும் வியாபார நிலையங்களின் உரிமையாளர்களும் மகிழ்ச்சியில் காணப்பட்டதையும் அவதானிக்க முடிந்தது.
, , ,

July 11, 2026


 நூருல் ஹுதா உமர்


அக்கரைப்பற்று மாநகர சபையின் எதிர்கால நீர்வளத் தாங்குதிறனை மேம்படுத்துவதுடன், வறட்சி மற்றும் வெள்ள அபாயங்களை திறம்பட எதிர்கொள்ளும் வகையில் நடைமுறைப்படுத்தப்படவுள்ள சர்வதேச திட்டத்தின் கீழ், மாநகர சபைக்குட்பட்ட பல்வேறு பகுதிகளில் கள ஆய்வுப் பணிகள் நேற்று முன்னெடுக்கப்பட்டன.

ஜேர்மன் பொருளாதார ஒத்துழைப்பு மற்றும் அபிவிருத்தி அமைச்சின் ஆதரவுடன், "Connected Cities" சர்வதேசத் திட்டத்தின் கீழ் இவ்வாய்வு இடம்பெற்றது. நிலையான நகர அபிவிருத்தி, காலநிலை மாற்றத்தால் ஏற்படும் சவால்களை எதிர்கொள்வது மற்றும் நீர்வள முகாமைத்துவத்தை மேம்படுத்துவதற்கான திட்டங்களை வகுப்பதே இத்திட்டத்தின் பிரதான நோக்கமாகும்.

இந்தக் கள ஆய்வில் அக்கரைப்பற்று மாநகர முதல்வர் ஏ.எல்.எம். அதாஉல்லாஹ் தலைமையில், மாநகர ஆணையாளர் என்.எம். நௌபீஸ், மாநகர சபைப் பொறியியலாளர், மாநகர சபை உத்தியோகத்தர்கள் மற்றும் உறுப்பினர்கள் கலந்து கொண்டனர்.

அத்துடன், அக்கரைப்பற்று பிரதேச செயலாளர் டி.எம்.எம். அன்ஸார் மற்றும் பிரதேச செயலகத்தின் பிரதி திட்டமிடல் பணிப்பாளர் ஏ.எம். தமீம் ஆகியோரும் ஆய்வில் பங்கேற்றனர்.

மேலும், திட்டத்தின் ஆலோசகர்களாகச் செயற்படும் தென்கிழக்கு பல்கலைக்கழகத்தின் புவியியல்துறை பீடாதிபதி கலாநிதி ஐ.எல்.எம். ஸாஹிர் மற்றும் சிரேஷ்ட விரிவுரையாளர் ஏ.எல். ஐயூப் ஆகியோர் கலந்துகொண்டு, நீர்வள முகாமைத்துவம் மற்றும் காலநிலை மாற்றத்திற்கேற்ப நகர திட்டமிடல் தொடர்பான தொழில்நுட்ப ஆலோசனைகளை வழங்கினர்.

சர்வதேச அளவில் தெரிவுசெய்யப்பட்ட மாநகர சபைகளில் ஒன்றாக அக்கரைப்பற்று மாநகர சபை இடம்பெற்றிருப்பது இப்பிராந்தியத்திற்குக் கிடைத்த முக்கிய அங்கீகாரமாகக் கருதப்படுகின்றது. இது தொடர்பாக கருத்து தெரிவித்த மாநகர முதல்வர் ஏ.எல்.எம். அதாஉல்லாஹ், காலநிலை மாற்றத்தால் உருவாகும் சவால்களை வெற்றிகரமாக எதிர்கொள்ளக்கூடிய, சுற்றுச்சூழலுக்கு உகந்த மற்றும் நிலையான நகரமாக அக்கரைப்பற்றை மாற்றும் நோக்கில் அனைத்து தரப்பினரின் ஒத்துழைப்புடனும் இத்திட்டம் முன்னெடுக்கப்படும் எனத் தெரிவித்தார்.

Subscribe to: Posts (Atom)

இணையவழி,குறுந்தகவல் மூலமாக, பொருட்களைச்,சந்தைப்படுத்துங்கள்! On WEB-ceylon24.com On Twitter @ceylon24 Tel:0777 761 477, 0759 761 477

Powered by Blogger.