பிரஜாசக்தி சமூக அபிவிருத்திக் குழுத் தவிசாளர்கள், செயலாளர்களுக்கான விழிப்புணர்வு

 நூருல் ஹுதா உமர்

அம்பாறை மாவட்டத்தில் பிரஜாசக்தி சமூக அபிவிருத்தி குழுக்களின் தவிசாளர்கள் மற்றும் செயலாளர்கள் ஆகியோருக்கான விசேட விழிப்புணர்வு மற்றும் திறன் மேம்பாட்டு நிகழ்வு இன்று இரண்டு மொழிகளில் தனித்தனியாக சிறப்பாக நடைபெற்றது. மாவட்ட மட்டத்தில் சமூக அடிப்படையிலான அபிவிருத்தி நடவடிக்கைகளை ஒருங்கிணைந்த முறையில் முன்னெடுக்க இந்நிகழ்வு முக்கிய கட்டமாகக் கருதப்படுகிறது.

சிங்கள மொழி மூலமான நிகழ்வு அம்பாறை ஹார்டி தொழில்நுட்பக் கல்லூரி வளாகத்தில் நடைபெற்றதுடன், தமிழ் மொழி மூலமான நிகழ்வு இலங்கை தென்கிழக்குப் பல்கலைக்கழக கேட்போர் கூடத்தில் இடம்பெற்றது. இரு நிகழ்வுகளும் அம்பாறை மாவட்ட செயலாளர் சிந்தக அபேவிக்கிரம அவர்களின் தலைமையில் ஒழுங்குபடுத்தப்பட்டன. மாவட்டத்தின் பல பிரதேசங்களைச் சேர்ந்த சமூக அபிவிருத்தி குழு பிரதிநிதிகள் பெருமளவில் பங்கேற்றனர்.

நிகழ்வில் பிரதம விருந்தினராக கிராம அபிவிருத்தி மற்றும் சமூக பாதுகாப்பு அமைச்சர் உபலி பண்ணிலக்கே அவர்கள் கலந்து கொண்டு உரையாற்றினார். தனது உரையில், கிராம மட்டத்தில் மக்கள் பங்கேற்பை உறுதி செய்யும் சமூக அமைப்புகளின் பங்கு மிக முக்கியமானது எனக் குறிப்பிட்டார். அரசின் சமூக பாதுகாப்பு மற்றும் வறுமை ஒழிப்பு திட்டங்கள் பயனாளர்களை நேர்மையாக அடைய, பிரஜாசக்தி குழுக்கள் வெளிப்படைத்தன்மையுடனும் பொறுப்புணர்வுடனும் செயல்பட வேண்டும் என வலியுறுத்தினார்.

கலந்து கொண்டதுடன் அமைச்சின் செயலாளர், மேலதிக செயலாளர், ஜனாதிபதி செயலகத்தின் மேலதிக செயலாளர் உள்ளிட்ட உயர்மட்ட அதிகாரிகள், மாவட்ட செயலகத்தின் பிரதான உத்தியோகத்தர்கள், பிரதேச செயலாளர்கள் மற்றும் சிரேஷ்ட அதிகாரிகளும் கலந்து கொண்டனர்.

நிகழ்வின் போது பிரஜாசக்தி சமூக அபிவிருத்தி குழுக்களின் நிர்வாக நடைமுறைகள், நிதி மேலாண்மை, சமூகத் திட்டங்களின் திட்டமிடல் மற்றும் கண்காணிப்பு முறைகள், தரவுத்தள பராமரிப்பு, சமூக பொறுப்புணர்வு மற்றும் நல்லாட்சி நடைமுறைகள் ஆகியவை தொடர்பாக விரிவான விளக்கங்கள் வழங்கப்பட்டன. குழுக்களின் செயற்பாடுகளை முறையாக பதிவுசெய்து, அரசு திட்டங்களுடன் ஒருங்கிணைப்பை வலுப்படுத்துவது குறித்து அதிகாரிகள் வழிகாட்டினர்.

பிரஜாசக்தி சமூக அபிவிருத்தி குழுக்களின் செயற்பாடுகளை வலுப்படுத்தி, கிராம மட்ட அபிவிருத்தித் திட்டங்களை திறம்பட முன்னெடுத்து, நிலையான சமூக-பொருளாதார முன்னேற்றத்தை ஏற்படுத்துவதே இந்நிகழ்வின் பிரதான நோக்கமாகும். இந்த முக்கிய நிகழ்வை அம்பாறை மாவட்ட திட்டமிடல் செயலகம் ஒழுங்கு செய்திருந்தது குறிப்பிடத்தக்கது.