அம்பாறை மாவட்ட விளையாட்டு விழாவில், ஆலையடிவேம்பு பிரதேச செயலக அணி சாதனை

 

வி.சுகிர்தகுமார்       

 விளையாட்டுத் திணைக்களத்தினால் நடத்தப்பட்ட 2026ஆம் ஆண்டுக்கான அம்பாறை மாவட்ட விளையாட்டு விழாவில், ஆலையடிவேம்பு பிரதேச செயலக அணி சாதனையைப் பதிவு செய்துள்ளது.
அம்பாறை மாவட்ட விளையாட்டு விழாவின் குழுப் போட்டிகளைத் தொடர்ந்து, இறுதி நிகழ்வான மெய்வல்லுநர் போட்டிகள் கடந்த 26ஆம் திகதி அம்பாறை சோமரத்ன விளையாட்டு மைதானத்தில் நடைபெற்றன.
இதில் ஆலையடிவேம்பு பிரதேச செயலகத்தை பிரதிநிதித்துவப்படுத்தி பங்கேற்ற பெண்கள் அணியினர் சிறப்பான திறமையை வெளிப்படுத்தி மொத்தமாக 2 தங்கம், 2 வெள்ளி மற்றும் 1 வெண்கலப் பதக்கங்களை வென்றனர்.
பிரபஞ்சனா பரிதி வட்டம் வீசுதல் தங்கப் பதக்கம் , எல்மிதா குண்டு போடுதல் தங்கப் பதக்கம், எல்மிதா பரிதி வட்டம் வீசுதல் வெள்ளிப் பதக்கம், கீர்த்திகா 400 மீற்றர் ஓட்டம் வெள்ளிப் பதக்கம், கீர்த்திகா  800 மீற்றர் ஓட்டம் வெண்கலப் பதக்கம் பெறப்பட்டன.
இதன் மூலம் 20 பிரதேச செயலக அணிகளுடன் போட்டியிட்டு, பதக்கங்களின் அடிப்படையில் அம்பாறை மாவட்ட மெய்வல்லுநர் போட்டியில் முதன்முறையாக இரண்டாம் இடத்தை ஆலையடிவேம்பு பிரதேச செயலக பெண்கள் அணி பெற்றுக்கொண்டது.
அத்துடன், மாவட்ட மட்ட வலைப்பந்தாட்டப் போட்டியில் ஆலையடிவேம்பு பிரதேச செயலக அணி இரண்டாம் இடத்தையும்,
மாவட்ட மட்ட கராத்தே போட்டியில் ஆலையடிவேம்பு பிரதேச செயலக ஆண்கள் அணி மற்றும் பெண்கள் அணி ஆகிய இரு அணிகளும் முதலாம் இடத்தையும் பெற்றுக்கொண்டன.
இவ்வாறு குழுப் போட்டிகள் மற்றும் மெய்வல்லுநர் போட்டிகளில் பெறப்பட்ட சிறப்பான பெறுபேறுகளின் அடிப்படையில், 20 பிரதேச செயலக அணிகளுடன் போட்டியிட்டு ஆலையடிவேம்பு பிரதேச செயலக அணி வரலாற்றில் முதன்முறையாக மூன்றாம் இடத்தை பெற்றுக்கொண்டுள்ளது.
ஆலையடிவேம்பு பிரதேச செயலக அணியின் இந்த வரலாற்று சாதனைக்கு எமது மனமார்ந்த வாழ்த்துக்கள்!