அம்பிட்டிய சுமணரத்ன தேரருக்கு உடன் புனர்வாழ்வளிக்கவேண்டும்



- மகாநாயக்க பீடாதிபதிகளிடம் சாணக்கியன் எம்.பி. வலியுறுத்து
அம்பிட்டிய சுமணரத்ன தேரருக்கு அஸ்கிரிய, மல்வத்து மகாநாயக்க பீடாதிபதிகள் உடனடியாகப் புனர்வாழ்வளிக்க வேண்டும் என்று தமிழ்த் தேசியக் கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் இரா.சாணக்கியன் வலியுறுத்தினார்.
நாடாளுமன்றத்தில் இன்று உரையாற்றும்போதே அவர் மேற்கண்டவாறு கூறினார்.
அவர் மேலும் தெரிவித்ததாவது:-
"நேற்று மட்டக்களப்பு மாவட்டத்தில் அம்பிட்டிய சுமணரத்ன தேரர் என்ற ஒரு தேரரின் அடாவடித்தனத்தைப் பற்றி இந்த இடத்தில் சில வார்த்தைகளை சொல்லத்தான் வேண்டும்.
அந்தவகையில் மட்டக்களப்பு மாவட்டத்தைச் சேர்ந்த ஏனைய நாடாளுமன்ற உறுப்பினர்கள், ஏனைய கட்சியினைச் சேர்ந்த நாடாளுமன்ற உறுப்பினர்களும் இந்தச் சபையில் இந்த விகாராதிபதிக்கு எதிராக உங்களை நாடாளுமன்றத்துக்கு அனுப்பியுள்ள மக்களுக்காகப் பேச வேண்டும் என்று விநயமான கோரிக்கையை
முன்வைக்க விரும்புகின்றேன்.
நேற்று மட்டக்களப்பு செங்கலடி பகுதியில் அம்பிட்டிய சுமணரத்ன தேரர் நடந்து கொண்ட விதம் தொடர்பாக திருப்தியடைய முடியாது.
அவர் தொல்பொருள் திணைக்கள அதிகாரிகளுக்கு எச்சரிக்கை விடுக்கும் தொனியில் நடந்து கொண்டுள்ளார். அவர் அரச அதிகாரிகளின் செயற்பாடுகளுக்குத் தடை ஏற்படுத்தும் வகையில் செயற்பட்டுள்ளார்.
பொலிஸாரை, கிராம சேவகரை, தொல்பொருள் திணைக்கள அதிகாரிகளை வீதிக்கு வருமாறு அவர் அச்சுறுதல் விடுத்துள்ளார்.
அவருக்கு எதிராக நீதிமன்றத்தில் பல்வேறு வழக்குகள் நிலுவையில் உள்ளன. அவருக்கு எதிராக இதுவரையில் சரியான முறையில் எந்தவொரு நடவடிக்கையும் எடுக்கப்படவில்லை.
இது குறித்து நான் பொலிஸ்மா அதிபர், பிரதமர் மற்றும் ஜனாதிபதி ஆகியோரின் கவனத்துக்குக் கொண்டு செல்ல விரும்புகின்றேன்.
முன்னாள் ஜனாதிபதி மஹிந்த ராஜபக்சவின் ஆட்சிக்காலத்தில், அவர் ஆர்ப்பாட்டத்தில் ஈடுபட்டபோது கைதுசெய்யப்பட்டிருந்தார்.
முன்னாள் ஜனாதிபதி மைத்திரிபால சிறிசேனவின் ஆட்சிக்காலத்திலும் அவர் ஆர்ப்பாட்டத்தில் ஈடுபட்டபோது கைதுசெய்யப்பட்டிருந்தார்.
எனினும், அவர் தொடர்ந்தும் அரச அதிகாரிகளுக்குத் தடை ஏற்படுத்தும் வகையில் செயற்பட்டு வருகின்றார். அவருக்கு எதிராக உரிய நடவடிக்கைகள் எடுக்கப்பட வேண்டும்.
அத்துடன், அம்பிட்டிய சுமணரத்ன தேரருக்கு, அஸ்கிரிய, மல்வத்து மகாநாயக்க பீடாதிபதிகள் இணைந்து புனர்வாழ்வளிக்க வேண்டும் என்பதையும் வலியுறுத்த விரும்புகின்றேன்.
நாங்கள் மதகுருமாரை மதிக்கின்றோம். நாங்கள் அவர்களை மதிக்கும் அளவுக்கு அவர்களும் நடந்துகொள்ள வேண்டும்" - என்றார்.


Advertisement