கொங்கோ மக்களாட்சிக் குடியரசின் (DR Congo) கிழக்குப் பகுதியில் அமைந்துள்ள கிவு ஏரியில் 50-க்கும் மேற்பட்ட பயணிகளுடன் சென்ற படகு ஒன்று எதிர்பாராதவிதமாக கவிழ்ந்து விபத்துக்குள்ளானது.
தெற்கு கிவு மாகாணத்தில் உள்ள இட்ஜ்வி (Idjwi) தீவுப் பகுதியில் நேற்று இரவு இச்சம்பவம் நிகழ்ந்துள்ளது. இந்த விபத்தில் 12 பேர் உயிரிழந்தது உறுதி செய்யப்பட்டுள்ளதுடன், பலர் ஏரி நீரில் மூழ்கி மாயமாகியுள்ளனர்.
விபத்து குறித்து தகவலறிந்த உள்ளூர் மீட்புக் குழுவினரும் மீனவர்களும் உடனடியாக தேடுதல் பணியில் ஈடுபட்டனர். இதுவரை 15-க்கும் மேற்பட்ட பயணிகள் பாதுகாப்பாக மீட்கப்பட்டு வைத்தியசாலையில் அனுமதிக்கப்பட்டுள்ளனர்.
இருப்பினும், ஏரியின் ஆழமான பகுதி மற்றும் இரவு நேரம் காரணமாக தேடுதல் பணியில் சவால்கள் நீடித்த போதிலும், மாயமானவர்களை மீட்கும் பணிகள் தொடர்ந்து தீவிரமாக நடைபெற்று வருகின்றன. இதனால் பலி எண்ணிக்கை மேலும் உயரக்கூடும் என அஞ்சப்படுகிறது.
கொங்கோவில் ஏரி மற்றும் நதிகளிலேயே பெரும்பாலான போக்குவரத்து நடைபெற்று வரும் நிலையில், போதிய பராமரிப்பின்மை, அளவுக்கு அதிகமான பயணிகளை ஏற்றுவது மற்றும் மோசமான வானிலை காரணமாக இது போன்ற படகு விபத்துகள் அடிக்கடி நிகழ்கின்றன.
இப்போதைய விபத்துக்கான துல்லியமான காரணம் குறித்து அரசு அதிகாரிகளும் உள்ளூர் பொலிஸாரும் விசாரணை மேற்கொண்டு வருகின்றனர்.
Post a Comment
Post a Comment